[هبوبي]

بسم الله الرحمن الرحيم
السلام عليكم ورحمة الله وبركاته .....

توي راجع من الشام لي خمسة ايام وحبيت اكتب لكم اول مارجعت بس المشكلهة كنت مريض جاي من هناك لاقط البرد
ومنسدح مافقت الا اليوم وقلت لابد اكتب للاححباب والاصحاب ......

السفره من يوم 7 الى 12 خمسة ايام يالتمام والكمال ...

بسم الله ابدا ...

قبل السفر بيوم

الله لايوريكم اللي انا شفته كثرت المشاغل وتراكمت كل ماخلصت شي جاني الثاني وتعقدت حتى اني في الاخير قلت شكلي ابي اكنسل والله جاتني حاله نفسيه المشكله ان لي عن الشام سنه ياناس ياعالم ياهوه سنه مارحتلها ويوم جيت اروح الا تتعسر بصراحه قمحت على قول الشيبان من السفره وقلت ياولد خيرها بغيرها وش اسوي بس كان فيه بصيص امل يعني تخبرون بس انعمس البصيص وصار مستحيل اروح وينكم تشوفون هبهوبي وجهه ملتوي مايسوى ريال ولا ابي اتلكم مع احد كائنا من كان اتصل علي صاحبي اللي يبي يخاويني وقال هبهوبي انا جاهز متى امرك ؟؟؟؟
والله اني بغيت اموووت قمت اتعصر قلت انت وش تقول قال وش فيك انت قلت والله يابن الحلال الاوضاع صعبه وانا انشغلت بامور ماقدراتركها لان مافيه احد يحل بمكاني قال لاحول ولاقوة الا بالله اجل تدري ضبط القهوة انا ابي امرك قلت حياك الله...

شوي الا الباب طق طق طق فتحت الا صاحبي قلط وتقهوينا قال وش فيه وجهك كنك حجه تلف مع الظهر وصاقعتها الشمس قلت لاتكلمني مانيب رايح معك ....
المهم صار يرفع معنوياتي شوي شوي ويقول ابشر ياهبهوبي والله مانيب رايح الا معك خليها بعد العيد او اخر الشهر وشوف ياهبهوب انا مضحي بروحه مع انها تهمني لاني بصلح سنوني انا علمتكم انه يبي يصلح سنونه في موضوع خاص وان شكله تقولون حجه بوادي النمل بصراحه ذبحني بالضحك قلت تدري وكل الله اصبر علي عندي محاوله اخيره اذا ماضبطت جهز الخيمه نبي نطلع عشيرة بر عندنا ههههههههههههههههههههههههههه.

المهم مالكم الا الزبده وانا اشمر عن سواعدي وارفع ثونبي بيدي اليسرا واربط الشماغ على راسي وبسم الله ....

وادخل على اخوي في غرفته ابي ادخل على الله ثم عليه يوووه لو تشوفوني تقولون هذ1 ميت عنده واحد انسان منشحذ عيوني طاير منها الشرار ...

بس المشكله يوم دخلت عليه الا ناااااايم ؟؟؟؟

خيبة امل ماهي طبيعيه قلت هالحين يبي له ساعتين عشان يفوق والله حاله ...
رجعت لخويي وهو في المجلس يوم شافني قال قمحه ولا شعيرة هههههههههههههههههه
قلت لاسذ1 ولا سذ1

اخذت شوي الا اسمع صوته وانا اعطيه راسي ويوم شافني يحسبني ابي اضارب ويحط يدينه على راسه قال انت وش فيك صاحي ولا مجنون ....
وكل ماقربت منه يبتعد خايف مني انا اقرب منه ابي اسلم على راسه عشان اطلبه وهو يبتعد يحسبني ابي اضربه هههههههههههههههههههههههههه

وبعد معركه استمرت عدة دقائق وانا اتمكن من جبهته واطبع عليها قبلة ........
قلت تكفى يابن امي وابوي انا خليتها سلوم قبائل الجزيرة وهو يناظر منصدم ومستغرب قلت له تكفى انا طالبك قال ابشر ابشر وش فيك انت قلت اقولك وماتردني قال ماردك قلت عندي كذ1 وكذ1 ابيك تتولى الامور هي بدالي انا مسافر الشام الله انه يرحم ابوك تكفى قال هاه ؟؟؟؟
يوم قال هاه انا قمت اتنافض احسبه يبي يقول اللي عندي مكفيني قال تم ياولد امي وابوي
هههههههههههههههههههههههههه

وينكم تشوفون هبهوبي طاير يمشي 200 كيلو في الثانيه للمجلس ويوم شافني خويي يحسبني مطرود قال اهيب انت وش فيك قلت اركب اللومينا وعلى مطار جده الدولي ولاتكلمني الا في الطائرة وتم بحمد الله الوصول الى المطار بعد نعركة المجلس والصالة ...

طبعا انا راح اخلي الموضوع في حلقات لان يديني تكسرت يا احبابي بكرة اكتب لكم الحلقه الاولى من الرحله


<==== اذا هذي المقدمه اجل الحلقه وش كثرها ياربي ياحبيبي ....


مع السلامه ابو الياسر معليش حبيبي ماشفت رسالتك الا يوم جيت السعودية تاخرت يابعدهم انت


ابي اقولكم اشياء تحمسكم للي جاي من خضم الرحله ...

1/ صاحبي والكلبشه بيده في المطار ؟؟؟

2/ ساق التاكسي في الشام والشقه ؟؟؟

3/ الدكتور محمد اديب وسنون صاحبي؟؟
4/ هبهوب الشرطه كافشينه هناك ؟؟
5/ هبهوب يوم التقى بالطيب الوافي هناك ووش اللي صار ؟؟؟
6/ وهناك الكثير زورونا تجدون الفرق لسنا الوحيدين ولكننا الافضل
اليوم الاول ...

اتصلت على صاحبي الساعه 11

 

 

[عادل المسعود]

ههههههههههههه هبهوبي حمدلله على السلامة ننتظرك بشوق

[المدمر هنري]

والله شكل سالفتك سالفه بس تعرف شوقتني للموضوع تكفى واللي يرحم والديك لا تطول علينا فيه حتى لا تزول روعه الموضوع ويقل حماسنا في متابعته مع التحية ( ابودانيال )

[عقيلات]

عناوين مشوقه فعلا

عجل علينا بالحلقه الاولى

[السفير]

اجل بالبنط العريض

نكتب لك

هبوبي ما ينلام

بين جدة والشام
نذبح لك جوز الحمام


نحن بانتظارك

[SimpleGuy]

انا من جهتي ناطر هالموضوعين
5/ هبهوب يوم التقى بالطيب الوافي هناك ووش اللي صار ؟؟؟
6/ وهناك الكثير زورونا تجدون الفرق لسنا الوحيدين ولكننا الافضل
لان اكيد في مفاجئات او مقالب ههههههههههه بالخامس
وليس الوحيد ولكنه الافضل
وانا بقول لك هبهوبي انا مستعد للمنافسة
والحمد لله عالسلامة يا غالي بس شو اخبار الطيب الوافي؟؟

[شوام]

واااااااو

(كلبشة) ، (الشرطه كافشينه)

وش القصة أخوي هبوووبي

كذا نخاف نروح للشام !!!!!

والحمد الله على السلامة وننتظر البقية .

[مواسم الحب]

الكل بانتظارك....والف الحمدلله على السلامة

تحياتي

[صـــقـــر]

ههههههههههههههههههههههه

الف الحمدلله على سلامتك اخي الكريم

هبهووووبي

وبإنتظار تفاصيل رحلتك على أحر من الجمر ،،،

[ابو الياسر]

بعد السلام
هلا فيك والحمد لله على السلامة والطائف نور برجعتك
ومالك فكة من برد الشام الا في برد الطائف
يا شارد عن ربي وين رايح

وبعدين تتعذر توك تشوف الرسالة بعدين الحساب

اذا تبيني اسامحك ارسل لي رقمك وابي اخذ علومك نروح الردف وتعطيني السحة والمحة