[الرساوي]

بسم الله الرحمن الرحيم

اخواني الاعضاء بما اني قد اكون اكبر الاعضاء سنا (فقط) طبعا غير المدراء(ابو مجاهد وعادل)هم اكبر
احب ان انقل بعض التجارب لكي يستفيد باقي اخواني ........
بقولكم موقف صار معي العام الماضي بطريق عودتي من سوريا
واهم شي ياخوان بالسفر هو الرفيق صدقوني مر علي الكثير من الاصدقاء وسافرت معهم او سافرو معي ويمكن ماتطلع منهم الا عدد بيسط يستاهل انك تروح معه رغم اني اعرفهم كلهم من سنوات لكن يقول الصديق ماتعرفه الا بالسفر نبدا القصه
في عيد الفطر عام 1425هـ جاني واحد من اقربائي ويكبرني سنا وطبعا اعرفه تمام المعرفه بس اول مره اسافر معه
وقال يالله نمشي لسوريا اسبوع ونجي وكل مصاريف السياره والسكن على حسابي الخاص وهو فعلا كريم وماعليه من ناحية الماده وبعد محاولات اقناع قلت يالله واخذنا واحد من الاصحاب طبعا قلت له السكن انا بدبره لك وانا الي بفاصل وانت تدفع قال اوكي وصلنا حدود جابر الا يوم تغير الرجال وراح اشترى من السوق الحرة انواع المشروبات وقام يشرب بالسياره من الحدود لين وصلنا الشام ويوم وصلنا صار الرجال مرتفع وكل ماندخل شقه ونتوصل الى حل خرب علينا طبعا اكبر منا ولا نقدر نقول شي احترام طبعا واخيرا لقينا شقه وجلسنا فيها
وصار طوال الخمسة ايام يشرب اعوذ بالله ونادى كم سوري يعرفهم بحكم انه تاجر وعنده محلات وصار يعطيهم من هالفلوس واشترو لي بضاع كذا وكذا قلت له وبحكم القرابه الي بيننا ياخي اذا تبي شي انا اروح بدالهم هذولا ياكلونك
ماسمع الكلام وصرنا انا وخويي نطلع وهو بالشقه نروح نسهر ونعيش جونا ونروح وهو جالس
ومره قام واعطاء السوري بطاقه الصراف حقته وقال رح اسحب لي 50 الف واجي انا واسحب منه البطاقه وسحبت له الي يبيواجي انا واغبيها عنه وقلت ضاعت صرف خلال هذ الاسبوع مايقارب 40000الف ريال والبضاعه انا شايفها ماتستحق اكثر من 100000ليره سوري وين الباقي؟
المهم خلص الاسبوع وقلنا يالله نمشي حنا ورنا دوام قال روحو انتم انا بجلس واجي بالطياره قلنا بكيفه وكان معنا بضاع لمحلا ته ويوم وصلنا الاردن قالو لازم تأمين على البضاعه حاولنا ماقدرنا والمبلغ 3000ريال قلت طيب ابي صرافه قال مافيه الا ببلد اسمه المفرق ويبعد 25 كيلو داخل الاردن قالو خل السياره وروح جب الفلوس والدنياء برد موت ولا علي ملابس ومشي لين طلعت من الحدود ولقيت ونيت وركبت وجبت الفلوس تخيلو طالع من الشام العصر يوم الخميس
ولادخلت الاردن الا الساعه 9ومشينا لحد مامسكنا طريق الازرق وكان سيد واحد ولا هاك الحادث سيارات كبار متصادمين
ومسكرين الطريق ولاتقدر تنزل من جنب الطريق الا اذا كان معك جيب ونتعطل 3ساعات المهم وصلنا القريات الساعه
1بعد منتص الليل وبعد ماوصلنا نمنا ولما جاء الصبح مشينا وبعد 250كيلو انقطع السير علينا و3ساعات لين جبنا سير
ومشينا وبعد ماتعدينا تيماء ضرب علينا كفر صلحناه ومشينا يعني رحله عذاب تخيلو معي هي ابتدت بالرفيق وانتهت بالسياره
هدفي ياخواني من سرد هذه القصه هي للاستفاده فقط
تقبلو تحياتي
ابو فارس سابقا

 

 

[الـقـنـصـل]

صدقت يابو فارس الصديق والله ياشباب اخر سفرة لي ضحيت باشياء كثيره بسبب الشي هذا شخص اعرفه من زمان وخوي لي هنا بس يوم طلعت انا وياه للخارج تغير عن اللي اعرفه لكن ما باليد حيله استحملته وهاودته واعطيته على قد عقله لكن اول ماوصلت السعوديه كل شي سواه صارحته فيه وعلمته اني كنت صابر علشان انا خارج السعوديه واكثر شي يهمني عدم تفريق الكلمة او الشتات هناك ومن بعدها اخذت درس لا اسافر مع شخص الا اذا كان مجرب مني او من قبل غيري بالسفر

[عادل المسعود]

اخي الرساوي حفظه الله ابو فارس سابقاً انا اصغركم تراني صغير توني انت وعقيلات والعمده شيبان ويني وينكم :d

اخي الكريم / الرساوي

قصة معبره ومفيدة فعلاً الصديق ما تعرف الا وقت السفر وياما سافرنا مع ناس أكثر من كذا يخلونك تكره السفر كله وتسافر احيانا مع شخص ما تعرفه ويطلع عسل ولكن قليل من هم على كيفك بالسفر فكل واحد له توجه وله اسلوبه الخاص انا عن نفسي احب السفر لوحدي أو مع شخص واحد فقط ويكون راعي فله لا احب سفرات الشلل مثل قبل خلاص انتهت كنا نطلع للشام 10 و 15 واحد ايام زمان وقطة ومشاكل .

اتمنى ان يستفيد الجميع من هذه القصة واخذ الحيطه والحذر قبل السفر واختيار الرفيق المناسب

ولك اخي الرساوي اجمل تحياتي وتقديري

اخوك : عادل

[عقيلات]

مشكور على النصيحه

وفعلا الرفيق في السفر هو سبب سعاده أو تعاسه

المشكله ما تعرف الناس الا بعد ما تسافر معهم

يالله الله يعين هذي الدنيا كلها تجارب

[ابو الشهيدين]

هلا بالغالى ابو فارس

الصديق هو اهم شئ في السفر

والسفره كلها قائمه عليه فالواجب اختيار الصديق في السفر حتى ( لا تشيل غثاك معك وزود تدفع له علي شان يغثك في السفر)

[صـــقـــر]

صدقت والله اخوي

ابو فارس

الصديق ماتعرفه إلا بالسفر ،،،

[هبوبي]

فعلا قصة معبره بس نتمنى ان نقطف ثمارها ونتستفيد منها
اما بالنسبه لي جربت كثير وبعضهم صالح وبعضهم طالح ..
لكن مثل بدر الدجا مالقيت ولاراح الاقي الله لايغير علينا

[السفير]

اخوي الرساوي
اشكرك ياخوي على هالموضوع الرائع
موضوع في الصميم عن الرفيق في السفر

السفر يبين لك الرجال ويبين لك معدنهم
اما يصير يعينك ويوسع صدرك ولا يصير حمل يشغلك ويبلاك
وتمنى انك تفتك منه باي طريقة

قد يكون راعي مشاكل ولا خرابيط شرب وماشابه ذالك
كلها تبي تكون مردها عليك

لاكن ان تنقيت خوي على النقاء والطيب
يبي يصير عون لك على الخير وعلى سعة الصدر
ونيس تقعد اسنين تذكر رحلتكم

[الرساوي]

اخواني
عادل
ابومجاهد
ابو الشهيدين
صقر
هبوووبي
السفير
اشكركم على هذا التفاعل الجميل ونا قلت لم اكتب هذا الموقف الا للفائده فقط
تحياتي للجميع

[ابو الياسر]

بعد السلام
أخي العزيز الرساوي تسلم وتشكر على الفائدة العظيمة وفعلاً لقد عانينا منها
والرجل لا يعرف خويه الا من شدة أو من رفقة طويلة
فبهذا تفحصه ويبان لك هل هو صالح لمرافقة أم أخر مره تمشي معه

فلنستفيد من بعض في تجاربنا