[LAMAREN]

0

0

السلام عليكم


أخواني - أخواتي الأعزاء


بصراحه ماكنت راح أكتب شي عن سفرتي السريعه هذي بس بصراحه شفت الأخ كامل الذوق حاطن تقرير عن رحلته وهي تقريباً نفس رحلتي ونفس التوقيت بس أنا من الرياض وهو من جده .... المهم ابسولف لكم شوي لأنه مو تقرير هذا مجرد سوالف وملاحظات سريعه لزيارتي للشام ...



أولاً :

الرحلة كان مخطط لها مسبقاً ( وحيداً ) رغم أني كنت ابلغيها بس بآخر لحظة قررت أني أسافر لأني بصراحه كنت متخوف من الوضع وأتصلت بمديرنا العزيز عادل وطمني وأكد لي بأن الوضع جيد ومافيه داعي للخوف وشرح لي مشكور وش اللي صاير بالضبط ..... وأقنعني بكلامه ... واحب هنا أني أشكره لأهتمامه بالأعضاء ومصالحهم .

ثانياً :

الرحلة كانت على متن الخطوط الجوية السعودية لأني بصراحه أحب أسافر عليها وارتاح جداً وانا أشوف شعارها بأي مطار من مطارات العالم . طبعاً الرحلة كانت من الرياض يوم الثلاثاء الساعه الثانية ظهراً .. والحمدلله وصلنا مطار دمشق الدولي الساعه خمسه تقريباً لأن الطيار الظاهر كان مروق ويتمشى ...
المهم لا أخفيكم سراً أول مره أشعر بالخوف خلال رحلاتي والله العظيم لأني بصراحه كنت متخوف من الوضع هناك .... لكن الحمدلله مشت الأمور كلها تمام بعد التفتيش والجوازات طبعاً بعد دفع كم ليره للشباب هناك بالجوازات والجمارك مدري ليش دفعت بس بصراحه شفت الناس تدفع لهم قلت اسوي زيهم وبلاش اسوي شديد يعني اريح راسي .... المهم طلعت من المطار .


ثالثاً :

أنا كنت مكلم يجي مية مكتب عشان الشقه ومتفق معهم المهم كل هالمكاتب مارحت ولا لمكتب منهم لان السواق بصراحه مدري ليش حسيت أنه طيب وعرض علي شقه قلت اوكي أشوفها المهم رحنا وشفت الشقه طبعاً اللي عجبني أنها بالخطيب يعني قريبه من باب توما وانا احب بصراحه هالمنطقه ( مدري ليش ) وبعد ماشفت الشقه عجبتني وأخذتها بسعر لابأس به ونمت هذيك الليله لأني كنت اتابع شاعر المليون بس بصراحه ماكملته لاني كنت تعبان مره صاحي من الصباح ومداوم وطالع المطار ...


رابعاً :

اليوم الثاني كنت معزوم بمنطقه أسمها عين الفيجه طبعا الجميع يعرفها المهم طلعت من الشقه على الساعه 11 ظهرا الجو كان جميل جدا جدا وصلنا هناك الساعه تقريبا 12 ونص تغدينا بمطعم اسمه ( الفيحاء ) بس بصراحه ماعجبني أكلهم يعني مهو بهذاك الزود .. المهم تغدينا وانبسطنا وتمشينا هناك وبعدين رجعنا على الساعه 6 . ارتحت في الشقه وطلعت الساعه 8 رحت لسوق الحميدية والشام مول بعدين حسيت بالتعب رجعت البيت تقريباً الساعه 12 ونمت .
اليوم الثالث طبعاً ان مع أني مستأجر الشقه مع شغالتها بس أن قلت لصاحب المكتب مابيها تجي وتوطوط علي ابد أبي الشقه بدون شغاله أنا رجال مرتب وأحب أخدم نفسي ولا راح أطبخ ولا انفخ ولا ولا ... طبعاً بعد ماصحيت اليوم الثاني الساعه 9 ونص افطرت وتابعت الأخبار و طلعت الحلاق وبعدين رحت روتانا كافي معزوم هناك بعد
( لاحد يحسدني ) المهم كان هذاك اليوم يوم الخميس جوا يجنن يجنن وفوق الخيال كان مغيم وفيه هوا بارده شوي المهم تمشينا شوي بالمنطقة بعدين دخلنا الروتانا كافي وتقهوينا هناك مع أن مافيه زحمه وكنت اسمع أن اسعاره غاليه بس بالعكس كانت مناسبه والخدمة كانت روعه طبعا بعدين نزلنا واشتريت كأس عليه صورة هيفاء وهبي بس .رجعت الشقه الساعه2 ظهرا وكان المطر خفيف ريحت شوي وبعد صلاة العصر رحت قاسيون كان منظر جميل جداً جداً بعدها رجعت الشقه ريحت شوي ..وبعدين الساعه 8 ونص كنت معزوم ( لا صح هالمره أنا كنت المضيف ) المهم رحنا سينما الشام وشفنا فلم ( هي فوضى ) فلم مصري بس حلو ويفطس ضحك خصوصا ان منة شلبي فيه وبعد ماخلص الفلم رحنا محل اسمه ( دامر اعتقد ) قريب من السينما وأكلنا بوظه .. بعدين رجعت ونمت الساعه 1
اليوم الرابع : صحيت متأخر شوي رحت صليت الجمعه وبعدين طلعت على طريق المطار وبالتحديد مطعم ( بوابة الشام اعتقد ) المهم كان مطعم جميل جداً وعجبني أكثر من مطعم القرية اللي رحت له المره الماضيه المهم تغدينا هناك واكلهم كان جيد وشربنا الشاهي وبعدين طلعت ( سكي لاند اعتقد ) أعذروني أنا ما احفظ زين المهم تمشينا شوي بالمول وبعدين طلعت المطار كانت الرحلة الساعه 6 مساءأ والحمدلله مشت الأمور تمام بعد ماعطيت كل الفلوس اللي معي موظفين المطار من الفرحه أني برجع السعوديه وحشتني والله

أعذروني على القصور وطبعاً صور مافيه لأنها كله خاصه

بس ملاحظة أخيره : الوضع هناك ممتاز جداً ولا فيه أي شي يخوف عااادي جداً

دمتم بود


0

0

 

 

[ســKSAــعودي]

اولا يا هلا ومسهلا بك معنا .. والحمد الله على سلامة الوصول ..

مادري ليش بعض الاخوة مايحب يذكر تقريرة او سرد لاحداث رحلتة
هو بتاكيد حر .. واذا كتب تقريرة بتاكيد راح يفيد الكثير
لما فية من فائدة وتجربة وذكر لـ السلبيات والايجابيات .
با الاضافة الى المتعة في كتابة التقرير وفي قرأتة من الاعضاء
ومشاركتة بتجربتة ...

وانت اخوي فعلت الصح بكتابة تقريرك .. وشاركتنا معك
في الرحلة .. لو خلف الشاشة ...

وبنسبة لاحداث رحلتك ..
يا سلام عليك متعة في سرد الاحداث ..
ورحلة ممتعة ...

تحياتي لك

[طربوش منقوش]

LAMAREN

الحمد لله على السلامة وش هالعزومة اللي تخليك ( تطق ) هالمسافه كلها


شكله اللي عازمك يستاهل تروحله ...


رحله قليلة المدة كثيرة الاحداث ما شاء الله عليك اخوي لفيت البلد بهالكم يوم


والحمد لله ان الوضع طيب بسوريا وهذا شي متوقع بصراحه

صحيح ان في ناس كثيرة متخوفه بس ومن خلال هالنادي تبين للجميع عكس ما يقال واكبر دليل التقارير المتنوعه من اكثر من شخص واللي يطمنون عن الوضع


كنت اتمنى وضع صور بس يالله الجايات اكثر

تقبل تحياتي

[نجم سهيل1424]

الحمدلله على السلااااامة

ولكن الرحلة في اعتقادي انها قصيرة جداجدا

[عادل المسعود]

اخي العزيز

الف حمدلله على سلامتك .. وانا أرحب بالجميع ويسعدني إتصالكم والتواصل معكم ويشرفني التعرف عليكم فجميع أعضاء النادي اخواني واصدقائي واحبابي .
في إتصالك شعرت أن لديك العزيمة وعاقد النيه على السفر وكنت متخوف قليلاً والآن الحمدلله أنت تعود وتنقل ما شاهدت بالضبط للجميع حتى لا أحد يقول عادل يبالغ أو طغى حبه لسوريا على وطنيته كما يقول البعض الحمدلله نحن نكتب الحقيقة وننقل الاخبار من مصادرها المسئولة مثل السفارة السعودية بدمشق فالاخوان بالسفارة يتابعون ويتصلون جزاهم الله خير ودائماً ينقلون لنا أن الوضع ممتاز والسائح له احترامه وتقديره في جميع المدن والمحافظات السورية .

شكرا لك وتقبل تحياتي

اخوك/ عادل

[نمر الحربي]

الحمد لله على السلامة
سفرة سريعه لكن المهم والاهم انك انبسطت وسعت صدرك
سلامي لك أخي العزيز

[عاشق الفيحاء]

الحمد لله على السلامه ...ليش أنزرع الخوف عند الناس ؟ سؤال لم أستطع ان أجد إجابه عليه!!!

[الذيب الشمالي]

(( صباحكم ياسمين دمشقي ))

الحمد لله على سلامة الوصول والرجوع إلى ارض الوطن

[كامل الذوق]

يعطيك الف عافيه على هالتقرير ... والحمد لله على سلامتك ...

وياليت اني تشرفت لو بالسلام عليك والتعرف بك (( بس فعلا شكل سفرتك خاصه شوي ههههههه)) والله اني اقولها وانا صادق ان قلبي وحبي وغيرتي على كل سعودي باي مكان ولو ان سوريا ما تعتبر غريبه علينا ....بس ما ادري اتمنى اني لما اقابل اي سعودي اسلم عليه (( بس اكيد انا ثقيل وراكد ))

وبالاشاره الى فكرة النادي انا اشجع انه يتم انشأه وبأسرع وقت لو يكون ملتقى للأعضاء فيه والتعارف المباشر ببعض .

[خاااالد]

الف الحمدلله على سلامتك ياغالي منورنا