[الباشا فيصل]

تقرير زيارة الباشا فيصل الأخيرة إلى سوريا بالصور

في البداية اعتذر من جميع الإخوان لتأخر التقرير لكثرة المشاغل وسفري المفاجئ واضع بين أيديكم تقرير عن زيارتي الأخيرة إلى معشوقة الكل سوريا الأسد فدعونا نبحر في خضم هذه الرحلة التي كانت مليئة بالمواقف الطريفة والمضحكة


أولا : وقت الرحلة ومدتها

بداية الرحلة يومالسبت بتاريخ 14 ذو الحجة 1426هـ حتى 27 ذو الحجة 1426هـ واستغرقتالرحلة مدة 12يوماً


ثانيا: وسيلة الرحلة
بالسيارة ونوعها فورد قراند ماركيز


ثالثا: أبطال الرحلة
أخوكم الباشا فيصل / الدليل السياحي للرحلة بدايةً من توصيف الطرق إلى التعريف بأهم الأماكن والمعالم في سوريا بحسب خبرتي ومعلوماتي المتواضعة والمسئول المالي للرحلة.



ابوكايد / شيخ الرحلة تعرفون كل سفره لها أمير هذا أمرناه وآخر شي خططنا للانقلاب عليه واخذ الاماره منه تدرون ليش ,,,,,,,,,!



أبو ندوش / هذا مصنع الضحك والمقالب والفلة كل من شافه يحسبه صغير يقول هذا شو جايبه معكم وهو ( شايب جن ) على قولهم, وهو المعاون السري للانقلابات وكما تدين تدان صارت عليه مواقف كثيرة مضحكة سوف نتطرق لها.

رابعا: أهدافالرحلة

الهدف من الرحلة سياحي بالدرجة الأولى للتعرف على أماكن جديدة لم تتم زيارتها في الرحلة السابقة والتعرف على الشام في فصل الشتاء حيث لم يتم لي زيارتها من قبل شتاءاً واخذ فكره عن شدة البرد هناك لاكن أبشركم أخذت مناعة بعد أن قام الشباب بدفني في الثلج آما هم صرت آمهم هناك كل يوم واحد منهم مريض وانا على رأسه علاجات وزهورات

ولقاء بعض الأصدقاء والتشرف بالتعرف عليهم ومشاهدتهم

انجاز بعض الأعمال التجارية ( فكرة طرحت وهي قيد الدراسة حالياً ) أتمنى أن تتم وترى النور قريباً.

خامسا : خط سير الرحلة

خط سير الرحلة كان بداية من

مدينة القصيم – حائل – مفرق الجهراء ثم يميناً إلى – تيما - تبوك – حالة عمار – الأردن – سوريا

ومن سوريا ما رحنا ولا مكان كانت الخطة أن نذهب إلى اللاذقية لزيارة بعض الأصدقاء ولاكن تم تعديل الخطة والسبب سوف اذكره لاحقاً لوجود موقف طريف

كانت هناك خطة لزيارة لبنان ولاكن للأسف الطريق مغلق على حسب كلامهم

سادسا: الصور و كميرا الجوال
اللي زعلني إني ما أخذت كاميرا الرحلات معاي لأني أعرتها لقريب لي لذلك اعتمدنا في التصوير على الجوالات لذلك اعذرونا على رداءة الصور

علماً أن التصوير تم من الجوالات التالية

الدمعة – الفارس – أي ميت

يوم السبت 14/12/1426هـ بداية الرحلة

الساعة تشير العاشرة صباحاً بداية يوم الرحلة ابوفيصل بالدوام الناس معيده وانا مداوم موعد الاجتماع عند ابوكايد في منزله والشباب في انتظاري وخذ توصيات من لا تتأخر و تجي بدري على شان تصحينا لأننا في الليل كنا سهرانين نرتب للرحلة وننتظر الغد شوقاً للرحلة. وصلت إلى الشباب الساعة 11 وصحيتهم من النوم وتعرفون الأشغال ما تخلص رحنا للمزرعة لإكمال بعض الاحتياجات تأخرنا حتى الساعة 1 ظهراً المشكلة إننا نبغا نمر على بعض المحلات على طريقنا لإكمال بعض الحاجيات والدنيا الحين الظهر مافي احد اضطرينا نجلس للعصر لذلك رجعنا للبيت لتناول الغداء الساعة الآن 3 والعصر ما عاد إلا خير حملنا أغراضنا وجالسين نتقهوى وكل واحد يتفقد أغراضه سؤال مفاجئ ؟

( الموقف الأول ) ( الجواز منتهي ) سألت أبو كايد وين جوازك عطيني إياه بشوفه ؟ قال أهم شي انه توه ما أنتها والباقي ايش تشوف فيه قلت شلون توه ما انتهى قال باقي فيه شهر وكم يوم قلت نعم !!! انا بصراحة انصدمت قلت وشلون باقي شهر وشوي إذا اقل من 3 أشهر ما تطلع لازم تجدد الرجال قلب وجهة من قو الصدمة واتصل على الجوازات وتأكد من صحة كلامي اتصل وطلع الكلام صحيح قلت اجل الله لا يهينك نزل شنطتك مالك حظ بها السفره قلت تدري شلون نبي نتوكل على الله وان شاء الله بتفرج الامور كيف ما ادري ولاكن عندي احساس إن الامور بتسير تمام اتصال مفاجئ من ابوكايد الى العاصمة الرياض واشتغل فيتامين ( و ) وجاء الضوء الأخضر بالتحرك بعد الاتصال بنصف ساعة ركبنا موترنا وسمينا بسم الله.

تدرون وش نسيت ؟ احد ينسى ثيابه يا الله تخلف رجعنا للبيت وأخذت ملابسي وأكملنا طريق الرحلة مروراً ببعض المحلات تأخرنا حتى الساعة 9 مساءاً بعد ذلك مسكنا الطريق توجهاً إلى حائل, البرد كان شديد تلك الليلة ولا كن الفروة تفي بالغرض والربع محتسين قدامهم ثلوج وصلنا حائل عند الساعة 12 ولم نتوقف إلا للتزود بالوقود ومن ثم مواصلة الرحلة.

يوم الأحد 15/12/1426هـ الخروج من السعودية مروراً بالأردن ودخول سوريا

ودورة شقق حتى منتصف الليل

الساعة 4 صباحاً الثلاثي المرح في تبوك وابوكايد دخل البلد وبدا يلف وما ندري ايش يدور آخر شي تدرون وين ودانا مستوصف والفطور كان إبرة عضل على هالصبح نبي من تبوك شي واحد اللي هو دفتر التربتك وسألنا قالوا لنا إن مكاتب التربتك اللي في المنفذ فاتحة 24 ساعة لذلك توجهنا إلا المنفذ عند الساعة 5 صباحاً كنا في حالة عمار بدينا أول شي بالعزبة وتجهيز الطعام للرحلة واكملنا احتياجات الرحلة القهوة والهيل والرز والسكر والفطور أنواع من المعلبات انا أشوف إنها اوفر لانا أخذنا اللي يكفينا طول مدة الرحلة بسعر ما تجاوز 250 ريال بعد كذا توجهنا لمكاتب التربتك ولفينا عليهم نبحث عن ارخص سعر لقينا ارخص مكتب لإصدار دفتر التربتك وكان بـ 500 ريال بعد ما انتهينا قالوا الشباب وش رأيكم نفطر الساعة الحين حوالي 7 صباحاً وتونا بأول النهار قلنا ما في مشكله طيب وين نفطر ؟

( الموقف الثاني ) ( فطور التربتك ) قال ابوكايد فطورنا ومعنا ليش نروح نفطر في المطعم نفطر هنا ! انا وأبو ندوش جلسنا نطالع في بعض هنا وين ؟ قال في مكتب التربتك قلنا لراعي المكتب المطعم مانبغا نفطر فيه وبرا الجو بارد نبي نفطر عندك وتفطر معنا الزول طلع اجودي وما قصر قال تفضلوا جبنا الصحون ونزلنا الفطور وبسم الله وكان أحلى فطور سميناه فطور التربتك.

بعد كذا جهزنا كل شي أوراقنا وأغراضنا ما بقى غير المغامرة والدخول إلا المنفذ خصوصاً إن موعد الرجعه قبل نهاية الجواز لذلك كنا مأملين ومتفائلين بالخير.

( الموقف الثالث ) ( الانتظار ) الساعة الآن 7 صباحاً أمورنا كلها جاهزة ما بقي غير الدخول للمنفذ عاد هذي المغامرة الصعبة تبون الصراحه اصعب موقف لاننا قطعنا مسافة 1600 كم على آمل جلسنا في المنفذ ننتظر ونتشاور هاه شرايكم ما عندنا شي لاكن مترددين حتى الساعة 10 صباحاً ثلاث ساعات من التردد قال ابوكايد تدرون الانتظار ما راح يفيد بشي بس يضيع علينا الوقت بالفاضي نتوكل على الله ونروح للمنفذ إن عدونا هذا المطلوب وان ما مشي الحال رجعنا لهلنا ما الله أراد نطلع ( عسى إن تكرهوا شيئاً وهو خير لكم ) في هذه اللحظة كان فيتامين ( و ) ينتظرنا ويبحث عنا اتجهنا صوب الحدود وضربات القلب تزادد كلما اقتربنا من ذلك الشباك وعلى أعصابنا وقفنا عند الشباك موظف الجوازات آهلين بالشباب ردينا هلا فيك وابتسامة خوف ومد جوازك شوي إلا ورحنا للشباك الثاني وزحمة عالم تأخرت جوازاتنا انا و ابوندوش رجعنا للسيارة قلنا بس لا والله إلا رجعنا لهلنا شوي إلا جانا أبو كايد يمشي الف طاير من الفرحة اطلع اطلع بسرعة قبل يهونون ويرجعوني ( وبانت علينا فرحة مالها وصوف - ونار المضحا قمت اليم حطبها ).

المهم طلعنا من السعودية بحفظ الله ورعايته متوجهين إلى مركز حدود المدورة الحدود السعودية الأردنية الساعة الآن حوالي 11صباحاً وصلنا لهناك التعامل جيد جدا والناس راجعة من الحج والزحمة خفت لم نواجه أي زحمة خلصونا الهاشميين بدون تعطيل مرحبين بنا في بلدهم عند البوابة الأخيرة لدخول الأردن لقينا عسكري بالجمرك قال طالعين عمان على طريقكم قلنا حياك الله وطول الطريق سواليف عن الأردن وعن الأماكن السياحية بالأردن عاد انا فيه مكان نفسي أزوره في الأردن وهو ( ما عين ) وتعرفت على الرجال وصارت بيننا معرفة نزلناه في عمان عند احد محطات البنزين ( كازية ) في وسط العاصمة وتزودنا بالوقود ووصف لنا الطريق المؤدية للحدود السورية ولاكن قائد الرحلة غير خط اتجاه الرحلة وقال وش ورانا حنا أصلا جايين نتمشى وبما أنني الدليله للرحلة اخليت مسؤوليتي ووصفت له الطريق لاكن تدرون وين رحنا للمصائف الاردنية جرش ومن حسن الحظ إننا لقينا مخرج طلعنا على الحدود السورية ولا كان رجعنا لعمان بصراحة الطريق حلو والمناظر خلابة بعد كذا وصلنا إلى الحدود الأردنية السورية مركز حدود جابر.



منظر من جرش



منظر من جرش



منظر من جرش



توقفنا عند محلات الصرافة انا بصراحة احب اصرف دايم من هناك لان فيهم ميزة وهي ارتفاع سعر الصرف أقولكم وشلون اتصلت على الشام الصرف كان 1000 ريال بـ 14500 ليرة صرفنا من عندهم بـ 14650 ليرة تلاحظون الفرق صح انه بسيط ولاكن أنت تحاول تصرف بأكبر مبلغ تقدر عليه أما بالنسبة لطرقهم وحيلهم فلدي موضوع في احد المنتديات سوف انقله للنادي في وقت قريب لتعم الفائدة من هذا الموضوع عن هؤلا الصرافين تحديداً وأفضل طريقة للتعامل معهم وقد رشح كأفضل موضوع المهم صرفنا ومشي الحال.

دخلنا مركز حدود جابر الحدود الأردنية السورية وختمنا خروج استعداداً للدخول إلى سوريا الحبيبة سوريا الأسد دخلنا الحدود السورية واستقبلنا بمثل ما ودعنا به إخواننا الهاشميين المنفذ كان فيه حركة شوي وفيه سيارات ليست بالمزدحمة ولاكن تعتبر متوسطة ( ما عمري مريت عليهم ولقيتهم فاضيين ) المهم لقينا شخص اردني هناك عرض خدماته علينا واخذ أوراق السيارة وراح يخلصها وراح معاه ابوكايد إنا ختمت جوازات الشباب ورجعت ما اخذت شوي إلا وهم جايين وتوكلنا على الله لمواصلة الرحلة المهم دخلنا سوريا الساعة 3 عصر يوم الأحد.

انا بدت عندي الاتصالات طلعت النوتة وبسم الله اتصالات على أصحاب الشقق للبحث عن سكن علماً أن لدي مجموعة كبيرة من الأرقام وورقه مليئة زودني بها الأخ عادل وكلمتهم من السعودية وجميعهم أبدو الترحيب ونحن في انتظارك ( ودامك من طرف عادل ما بتكون إلا رضيان ) عوضاً عن معارف لي انا شخصيا وناس سبق أن سكنت عندهم وجربتهم ولاكن حبينا نغير لطلب الشباب بديت ارتب أمور السكن لأني عارف ان فيه ناس في بداية دمشق تستقبلك وتفرش لك الأرض ورد وكل همهم الكمسيون لذلك حذرت ابوكايد وقلت له لا توقف لأحد عارفين طريقنا زين والجماعة في انتظارنا المهم وصلنا إلى بداية دمشق الساعة 4 عصراً من يوم الأحد وقبل ما نوصل محل التكاسي والناس اللي تطلع عليك من القزاز تقول هوشه مو أجار شقق.

 

 

[الباشا فيصل]

( الموقف الرابع ) ( فخ المكتب ) كانت خلفنا سيارة تأشر بالنور لما وصل جنبنا اشر لنا يبينا نوقف السيارة جديدة وكان شخص لوحده انا شكيت انه منهم لذلك قلت لا بوكايد لا ترد على احد السكن وموجود وهو نشب لنا قال تدري خلنا نستكشف ووقف المهم نزل الرجال وسوا لنا عراضة من كثر الترحيب وقصيد وما خلا شي ما قاله حتى خلا الدعوة علوم قبايل طيب وبعدين ؟ قال بدكم سكن يا شباب عندي اللي بدكن ياه ؟ انا ضحكت لأني حاس من البداية قلت شكراً وحرك يا ابوكايد الناس في انتظارنا لا نتأخر نبي نرتاح من عناء السفر قال خلينا نشوف ايش عنده يمكن نلقى شي مناسب إذا ما حصلنا نروح لربعك دامهم معطينك OK بعدين كلها شغلة نصف ساعة ساعة بالكثير, قاله وش اللي عندك قال اللي تطلب واشتغل فلل شقق سوبر ديلوكس سوبر ملكي والإيجار رخيص وآمان والشغالة مدري وشلون المهم ما خلى شي فرش الأرض ورد ومشي معي وشوف وما راح تخسر شي قال الحقوني بوقف سيارتي واركب معاكم ( لا والله علقنا ) ركب معانا ( ركزوا على الوقت الساعة الحين 4 العصر ).

وبدت اتصالاته رحنا على كم فله الأولي مافي مستوى قلنا نبي شي أرقى الثانية الثالثة وكانت خلف ديسكو تروبيكانا بالضبط ولها باب على مواقف الديسكو حليلة ولاكن لكبر مساحتها باردة جداً مع إن فيها تدفئة, ما عجبنا شي.

قلنا ورينا الشقق اتصالات من واحد لواحد رحنا لكم شقة بصراحة اللي استفدت منه شي واحد انه أخذنا على شقه حلوة جداً جداً جداً بكل أمانة وأكيد إن فيه احد منكم يعرفها اسمها ( الفرعونية ) في العباسيين صاحبها اسمه ابوجوني الشقة فاخرة جداً هي عبارة عن ( غرفتين نوم وبغرفة النوم ساونا وجاكوزي والتدفئة مركزية وأثاث وديكورات وفرش راقي بصراحة تصلح لشخص لوحده أو اثنين بالكثير غير كذا ما تصلح ) الشقة ما فيها كلام ولاكن صاحبها قال إذا بتسكنون عندي الخميس لازم تطلعون يعني 4 أيام بس لأنها محجوزة من يوم الخميس ومدفوع إيجارها وغير كذا طلب علينا إيجار خيالي 1500 ريال باليوم يعني 21000 ليرة تخيلوا في الأخير اتضح لي إن 70% من المبلغ كمسيونات.

لان واحد صاحبي عنده مكتب اسمه ابورامي يعرفة اخوي الرساوي سألته عنها قال أجرتها من ابوجوني لشباب من السعودية بنفس اليوم لمدة أربعة أيام بـ 700 ريال يعني 9000 ليرة مع كمسيونه لأنه صاحب مكتب انا أشوف انه سعر مناسب لذيك الشقة تستاهل واللي يعرف الشقة راح يشاركني الرأي يعني 12000 ليرة كمسيونات شفتوا وش كبر حجم المصيبة المهم قلنا NO وكسبنا شوفتكم وضربنا الباب.

اتجهنا لشقة في مزة الجبل آما وصفها ما ادري وين كأنك تبحث عن ( خريطة الكنز) الشقة حلوة وفخمة صاحبها محترم وموسيقي يعمل في الإذاعة والتلفزيون ولاكن إيجارها غالي لذلك ضربنا الباب.

ورحنا للتجارة وشفنا كم شقة المهم ما لكم بالطويلة دوران حتى الساعة 10.30 مساءاً أنا سهران وتعبان وما عاد اجمع والبطارية فارغة عندي وكل هذا بسبة الوقفة لا عادت وضاعت 6 ساعات بدون فائدة أنا قفلت معاي وكنا عند مكتب لهم وما اتفقنا على شي وجينا ماشين تصدقون سبقني على السيارة قلت لو سمحت انزل وما رضي ينزل من السيارة لين طردته علني أنا عصبت خلاص ما عاد أتحمل قلت أقول انزل وتوكل على الله لا عاد أشوفك.

لحقنا واحد من مكتبهم على نفس السيارة وما انتبهنا له من كثر التعب والبحث عن شقة أثرها للمكتب طلعنا لطريق المطار فيه فله هناك كلمنا صاحبتها اسمها هيام وهي صاحبة مكتب وكانت بانتظارنا نبي نروح نشوف الفله لمن وصلنا جرمانا إلا سيارة تأشر انتبهنا وإلا نفس السيارة وواحد من نفس المكتب خير يا خوي وش تبي هذي والله البلشه قال سيبكم من الأول المره هذي أنا عندي شقتين لي شخصياً وعند خالي 4 شقق وانا لحقتكم بعيد عن المكتب نبي نفيد ونستفيد وشوفوا بعيونكم طيب وين الشقة قال بركن الدين ومن جرمانا رجعنا إلى ركن الدين وطلعت مو اقل إلا أردى من الردى وريحه أنا بغيت اضربه ذيك اللحظة والساعة الحين 11.30 ولازم نحسم الموقف طلعنا من الحارة وكان يتابعنا بالسيارة وقفناه وبغت تصير هوشة لاكن ربك ستر حنا من التعب ما عاد بقا اخلاق.

وقفنا عند مستشفى ابن النفيس اتصلت على احد الأرقام اللي أعطاني إياها الأخ عادل وكلمت شخص اسمه ناصر قال لحظات واكون عندكم جاء الرجال مشي وركب معنا قال الشقق اللي عندي كلها مؤجرة لاكن بنروح لواحد اسمه عمار ابوباسم ان شاء الله نلقى عنده شي مناسب الاخير قال بوديكم لشقه بالمساكن أتمنى تعجبكم قلنا نشوف رحنا الشقه وهي في نفس العمارة اللي فيها شقة برج العرب والشقتين لنفس الشخص ( غرفتين وصالة كبيرة ومطبخ ودورة مياه وكميرا على المدخل ) الشقة حلوة جداً صاحبها اسمه حسام أخذناها بـ 4000 ليرة باليوم عند كتابة العقد قلنا لهم يومين العقد وبعدين نمدد إذا مشي الحال لاكن رفضوا حنا من زود التعب واللي صار علينا قلنا مو مشكلة الشقة حلوة وما فيها شي وما أظن نغيرها لاكن تعال يا عمار ابو باسم إذا ما ارتحنا بالشقة ونبي نطلع المصاري ترجع قال من هالشنب ترجع مشي الحال.




ابوفيصل في الشقة




ركن الصوتيات





مدخل لاحد غرف النوم



اضاءة في الارضية



جمال الديكورات والتصميم على مداخل غرف النوم



الصالة الجلسة فيها ممتعة



الصالة



مدخل الشقة يمين الصورة



المطبخ و ( الشعلان ) ما عنه غناة





الحين ما نفكر غير بالنوم طلبنا عشاء من مطعم أمية وتعشينا ونومه وعدة ذيك الليلة على خير وربك ستر ما ارتكبت جريمة.

يوم الاثنين 16/12/1426هـ أهم شي الراحة النفسية

( الموقف الخامس ) ( نبي نطلع من الشقة ) اصبحنا يوم الاثنين الساعة 10 صباحاً هاه كيف اصبحتوا قال ابوكايد ما ادري أنا غير مرتاح نفسياً من الشقة قلت شلون قال ما ادري إحساس أنا مليون علامة تعجب قدامي ( يعني 1 ويمينه 6 اصفار من هذي !!! ) وضاق صدري المشكلة اني حريص عليه جداً وابيه ينبسط بأي شكل ومستعد اضحي على شانه واللي يبي يصير بس ينبسط ( لسبب خاص ) اتصلت على عادل وصبحته ذاك اليوم قلت الموضوع كيت وكيت وكيت وحنا نبي نطلع وفلوسنا عندهم شرايك قال انتم نمتوا وصحيتم من النوم وقلتوا نبي نطلع ما شفتوا شرهم من خيرهم انتظروا شوي وبلغني ايش يصير معاك, قلت للشباب الشغاله حتى الان ما جات خلونا ننتظر شوي لا نستعجل وبدت رحلة الانتظار جات الساعة 11 محد جاء قمنا انا وابوندوش على المطبخ ونزلنا العزبة وسوينا القهوة والشاهي والفطور وما ناقص غير شبة النار تقهوينا وافطرنا واللي علينا بالخير وعيوننا للكميرا اللي علي الباب ننتظر تشريف الشغالة اتصلت على المكتب تحت قلت محد جانا الساعة الحين 1 الظهر وش السالفة لا شكل الطلعة تأكدت واتصالات وحوسة المهم شرفت البرنسيسة الساعة 2 النفس مو اللي تبي قلنا لا طابت النفس من الشقة كلها الحي بدا إعلان الخروج من الشقة رسمياً بالاعتماد من ابوكايد بدون منازعه.

عند العصر ذهب ابوكايد لشراء بطاقة ياهلا عند الساعة 5 مساءاً قمنا بزيارة لأحد الأصدقاء لي لنشاوره في موضوع الشقة ورغبتنا في استرجاع المبلغ كما انه يملك شقة ومن حسن الحظ إن ما فيها مستأجرين قلنا حلو إذا طلعنا جينا وسكنا عندك المهم رجعنا للشقة المغرب اتصلنا على عمار ابوباسم جانا الرجال قلنا الوضع كيت وكيت والحين نبي نطلع اتصل على صاحب الشقة وجاء وكلام ومباحثات وكل شوي ساحبين واحد على جنب وحنا رأينا واحد نبي نطلع ومفاوضات حتى الساعة 8.30 مساءاً آخر شي اخذوا حق ثلاثة أيام وعطونا الباقي وبكل امانة عمار ما قصر معنا بشي تزهل وطلع قد كلمته المهم شلنا أغراضنا وتوكلنا على الله.

الاتجاه الان إلى الخطيب للشقة اللي دايم اسكن فيها بصراحة هي بدروم وفرشها متوسط ولاكن أمينة وارتاح فيها غير كذا الجيران والحارة كلها تعرفني أول ليلة كنا معزومين عند أصحاب الشقة وطلعنا سهرنا في احد المطاعم وانبسطنا وبذلك انتهى اليوم الثاني.

[الباشا فيصل]

يوم الثلاثاء 17/12/1426هـ يوم حافل بلودان والزبداني والمسجد الأموي

هذا اليوم ترتب وضعنا وتأمن السكن وكل الامور تمام الان بداية الرحلة والوناسة.

اليوم الثالث عند الصباح ما صحيت إلا على صوت ترتيب الشغالة وهي حرمه كبيره اسمها أم حسن وهي طيبة جداً الشغالة هذي اول مره أشوفها بالشقة هي ما سكتها من 6 سنوات وتوقفت لفترة والآن عادت للعمل بها وقت ما كنت انزل كان فيها شغالة ثانية أنا ما شفت أفضل منها قوية وشغلها مضبوط واهم شي الكبسة على كيفك.

أرسلت الشغالة وجابت أغراض الغداء وضبطت لنا الكبسة صحينا الشباب الساعة 1 تغدينا بعدها بدا التخطيط وين نروح قلت دام الوقت بدري والنهار توه نبي نروح أول شي للثلج في بلودان والزبداني توجهنا إلى هناك درجة الحرارة كانت -1 واحد تحت الصفر ووصلت حتى -2 عند قرب المغرب تمشينا وانبسطتنا وتصورنا وقام الشباب بحركة خيانة ضدي ودفني في الثلج وامتلت ملابسي بردت جداً لاكن لحسن الحظ إني جايب معي ملابس احتياط والحمد لله عدت على خير بعدها صار عندي مناعة ضد البرد.




بلودان وشاهوا الثلج يغطي رؤس الجبال والاتجاه الى تلك المنطقة



شاهدوا درجة الحرارة من السيارة



صورة جماعية




أحلى الذكريات



ابوفيصل وأشجار الكرز




ناقص فنجال شاهي




تحدي الثلج



ابوندوش وصورة للزمن




ابوندوش يرفع علامة النصر ولاكن الثلج انتصر عليه



يله مشينا يا شباب ذبحنا البرد



هذي شحن للسعودية



لازم صورة للسيارة



نزلنا إلى الشام بعد المغرب وتوجهنا إلى سوق الحمدية تمشينا بالسوق ودخلنا المسجد الأموي داخل المسجد تعرفنا على شخص اسمه إبراهيم الحسين دارس آثار وهو شخص لدية معلومات غنية عن الأماكن الأثرية في سوريا المساجد القلاع الحصون كذلك يتمتع بجودة الأسلوب وحسن الحديث أعطانا معلومات مفصلة عن المسجد الأموي كما أخذنا في جولة على المنطقة المحيطة بالمسجد مرورا بمقهى النوفرة والأحياء الدمشقية القديمة المحيطة بالجامع الأموي ودخلنا إلى احد القصور وهو قصر الوليد بن عبدالملك بن مروان وشاهدنا جمال البيوت الدمشقية القديمة وطريقتهم في تصميمها وبنائها وأقسامها,

كنا على موعد لذلك استأذنا منه وأخذت رقم جواله كنت انوي أن أعود إليه لاستزيد من معلوماته واسأله عن بعض الأماكن.



قبة النسر سميت بذلك لان شكل القبة يمثل الرأس والاطراف تمثل جناحي النسر



بيت المال وله ثلاث مفاتيح مع الوالي والقاضي وخازن بيت المال ومن ينظر من الجهه الاخرى يشاهد ان الباب له ثلاث كوالين

رجعنا للبيت والشباب شكلهم اخذوا برد من الثلج لذلك الليله نوم بدري.

[الباشا فيصل]

يوم الاربعاء 18/12/1426هـ جبل قاسيون المالكي والشعلان وابورمانه

اليوم الرابع كالعادة اصحى من النوم على صوت ترتيب ام حسن عاد انا نومي خفيف واصحا على اقل صوت لذلك الساعة 10 تلاقيني صاحي تغدينا وبعد الغداء اتصلنا على صاحبنا ابوبشار نبي نروح نتمشى طلعنا وفتلنا بالشام صعدنا إلى جبل قاسيون للاستمتاع بروعة منظر الشام من الاعلي بصراحة المنظر كان خيالي ولاكن البرد ما قصر فينا نزلنا وكملنا فتل في المالكي والحمراء والشعلان وابورمانه وهناك توقفنا عند مكتب لطباعة بطاقات الزواج بالقرب من فندق سميراميس ومنه طبع ابوكايد بطاقات زواجه السعر كان حوالي 2000 ليرة وكان شي راقي جداً جداً والدعوة عامة بتاريخ 13/5/1427هـ في بريدة.

ثم ذهبنا للمالكي وتوقفنا عند كوفي شوب لتناول المشروبات الساخنة ولا تنسون التفاحتين.





فــــــــوق هــــــــام السحــــــــب




بعد ذلك خرجنا لتناول العشاء هاه وش رأيكم وين نتعشى قالوا عشاء خفيف قلت اجل توجه للميدان فيه محل في بالي المحل هذا وصا عليه السائح الهروي عرفتوه ؟ شاورما الموصللي رحنا هناك وأخذنا أحلى شاورما وتعشينا والحمد لله وبعد ذلك توجهنا للسهر.

يوم الخميس 19/12/1426هـ فندق الفصول الاربعة

في ذلك اليوم استمر الجدول كالمعتاد عند العصر اتصلنا على صاحبنا وتواعدنا في شارع الحمراء تمشينا في بعض المناطق داخل الشام بعد ذلك رحنا للفور سيزونس كان فيه ذاك اليوم عندهم زيارة رسمية أو شي كذا المهم ما تشوف غير سيارات وعالم أخذنا جولة فيه على الطاير وطلعنا لان الجو كان رسمي جداً حتى ما قدرت أصور عند زيارتي لسوريا في الصيف كان الفندق لم يفتتح وفي هذه الزيارة أتيحت لي فرصة زيارته واخذ جولة بداخله بصراحة الفندق رائع بكل معنى الكلمة وقمة في الفخامة للأسف لم استطيع اخذ صور له بعد ذلك ذهبنا للسهر.

يوم االجمعة 20/12/1426هـ عندنا ضيوف من اللاذقية

هذا اليوم انا صحيت متأخر تدرون ليش فقدت الازعاج من ترتيب ام حسن والتليفون اللي كل شوي مسمعنا صوته عندنا ضيوف خاصين لابوكايد وانا ما ادري سبق وقلت لكم اننا نخطط للذهاب لللاذقيه السبب كان لزيارة بعض الاصدقاء ولاكن ابوكايد رتب معهم وتم تعديل الخطة ونزلوا من اللاذقيه للقائنا والسلام علينا.

( الموقف السادس ) ( القهوة والغاز ) انا قمت من النوم لقيت العالم قدامي سلمت عليهم وجلست معهم شوي انا متعود على فنجال قهوة من يد ام حسن ابوكايد وين ام حسن قال مشيتها اها قلت يا ولد سو فيها ذيب وانك تعرف تسوي قهوتهم وخلهم ما يدرون الا وانت داخل عليهم بالقهوة لان ابوكايد لقيته جايب لهم عصير والله فشله المهم رحت وضبطت ذيك القهوة اللي على كيفك المهم جلست مع الربع وصبيت لهم وانا احتري كلمة يسلموا من يد ما نعدمه ومن هالكلام لاكن ما اشوف الا العالم تتصدد وش السالفه انا دريت إن فيه شي وش السالفه قالوا القهوة خفيفه مره ما تنشرب الا ابوكايد عطانا ذيك الضحكة على كيفك انا تفشلت ولاكن اخذت الموضوع بروح رياضيه وقمنا نرقع الموضوع واننا متعودين على قهوتنا العربيه اقتراح من ابو كايد الا شرايك تسوي لنا قهوتنا العربية على شان نذوقها الربع شلت فناجيلي وهجوم على المطبخ حطينا البريق على النار نبي نضبط المهيله ورحت اصحي ابوندوش قوم عندنا ضيوف ( القصد نبي نخرب على ابوكايد ) ورجعت جلست معهم شوي رجعت للمطبخ الا الغاز مطفي ابوكايد انت مطفي الغاز قال لا ابوندوش أنت مسويها قال لا وش العلم تدرون ايش صار خلص الغاز هلا هلا كملت هي من الصبح فضايح المهم الضيوف أخذوها بروح رياضيه ولا عادي ما بدنا شي وافتشلنا مع الضيوف.

يوم السبت 21/12/1426هـ ابشركم القير خبط

عند الفجر كنا راجعين من السهره الساعة الان تشير إلى 5 صباحاً السيارة خربت بالطريق ويا الله وصلتنا الشقه والحين تعبانين ونبي ننام واذا صحينا نتفاهم انا ضيقت صدري السيارة وما جاني نوم اتصلت على صديق لي وقلت له تجيب معاك ميكانيكي وتجي الصباح ونمت نومه لك عليها المهم الساعة 11 إلا والشغالة تصحيني طلعت وبدينا نحوس بالسيارة نبي نعرف العطل بالضبط على شان نشوف أمورنا كيف تصير وشغل حتى الساعة 1.30 ظهراً ما صار معنا شي المهم قلت خليها نجيب لها ناقله ونشيلها على الورشة رجعت للشقة وتغديت انا والشباب واتصلنا على صديق اخر لنا وجانا بعد المغرب ومعاه ميكانيكي كشف على السيارة وقال أبشركم القير مخبط ولازم الورشة توضيب جبنا الناقلة وشلنا السيارة على الورشه في صناعية حوش بلاس انتهينا تقريباً حوالي الساعة 9 مساءاً بعد ذلك رجعنا للشقه وضبطت للشباب برادي على كيف كيفك ينسيك التعب.

وش رايكم وين نسهر الليلة الجواب معروف كالمعتاد وكنا نبي ناخذ معانا صاحبنا ولا كن الرجال اعتذر وذهب إلى منزله اما نحن جلسنا حتى جاء وقت السهرة واستقلينا تاكسي وذهابنا ولاكن في الغد ينتظرنا يوم حافل.

يوم الأحد 22/12/1426هـ يوم في صناعية القدم

صحينا في ذلك اليوم الساعة 10 لان ورانا مغثة الورش كلكم عارفينها لا عاد ووين برا السعودية كملت اتجهنا إلى هناك في ذلك الوقت يكون الميكانيكي بدا يشغل وحدد المشكلة بالضبط وشاف لنا القطع هل موجوده والا البسامي موجود اتفقنا مع احد المحلات لشراء قير كامل وتركيبة ولاكن بعد ما رحنا طلع فيه مشكله ورده الميكانيكي الرجال طلع جيد ونصوح قام وفك القير حق موترنا بيشوف المشكلة بالضبط والحمد لله من حسن الحظ طلعت المشكلة بسيطة وبدال ما نشتري قير بـ 35000 الف ليرة أصلحنا المشكلة بـ 6500 ليرة وبردها الله بالعافية السيارة ما خلصت الا الساعة 9 بالليل أخذنا موترنا متوجهين إلى السهرة مباشرة.

يوم الاثنين 23/12/1426هـ تعديل الخطة من مطعم الذكريات إلى مطعم القرية

منطقة قدسيا ذكرها لنا الكثير من السوررين يقولون فيها مطاعم حلوه مثل الروابي والذكريات اتفقنا إن نذهب للعشاء هناك عاد وين قدسيا ؟ ونمشي نسأل والله ما ادري وين رحنا ضيعنا واخر شي يوم قربنا للمنطقة جانا اتصال مفاجئ لابوكايد كان عزيمة خاصة على العشاء لك انت وضيوفك بس وين ؟ في مطعم القرية بطريق المطار وسوينا U TURN وعلى طريق المطار وبقي مطعم الروابي والذكريات في النوته حتى زيارته في وقت لاحق, وعند بوابة المطعم كان في استقبالنا اصحاب الدعوة مع الشوفير.

( الموقف السابع ) ( البالوت ) بعد العشاء وشرب الشاهي واذا بشباب من السعودية داقين اربعة في هذه اللحظة بغى يموت ابوكايد من الشفقة على البالوت وقال بالوت وفي سوريا ما احلا منها استأذن من اصحاب الدعوة وطلب انه يلعب داس واحد مع ابوندوش وتحدى الشباب السعوديين وقبلوا التحدي وكان التحدي من عشاء في مطعم السيران وكنا نتوقع ان يهزم الشيخ ولاكن كان قد التحدي وهزمهم واعتذر عن العشاء وبعد كذا رجع للجلسة مع المعازيب مبرراً موقفه وانه لا يقاوم البالوت خاصة عندما يكون فيه تحدي.

يوم الثلاثاء 24/12/1426هـ زيارة من الاخ العزيز ابو رامي

في عصر هذا اليوم زارني صديق لي وهو الأخ ابو رامي يعرفه الأخ الرساوي وهو صاحب مكتب تعامله جيد أتمنى إن يجربه الإخوان وان يتعاملوا معه ذهبنا لأنها بعض الأعمال الخاصة وكان معنا الاخ ابوندوش ثم عدنا للشقه.

( الموقف الثامن ) ( وش صار بشقتنا ؟ ) فتحنا باب الشقه الا والمخاد واصله الباب والدنيا حوسة تقول فيه مباراة بالشقه الا ابوكايد عازم له ضيوف وكان عددهم كبير والشقه على قدنا ما تتحمل العدد اللي كان موجود لاكن الشيخ كريم وسوا شقتنا مضافة الشيخ ابوكايد دخلنا انا وابوندوش الا وابوكايد مسوي قاضي العشيرة وجالس بالنص وبالشورت مصيف والناس بردانيين وما همه شي اثره عازمهم على العشاء عندنا بالشقه قال لنا يا شباب نبي عشاء تصرفوا طلعنا انا وابوندوش ما ندري وين نروح يا ولد هاذولا وش يعشيهم قلت تدري شلون توجه للمساكن وعلى مطعم المندي اللي في المساكن ونص تيس مع المعلوم وزين اللي كفاهم وما افتشلنا مع ضيوف الشيخ.

بعد ما راحوا اخذت غفوة حتى حان موعد السهره.

يوم الاربعاء 25/12/1426هـ الحمدية وليلة باردة جداً ومرقة فول

الساعة الآن 7 مساءاً والسفر باقي له كم يوم عاد انا في بالي كم غرض ودي اخذ هدايا للاهل وحاط عيني على كم محل من زيارتنا السابقه للسوق قلت مين يروح معاي قال ابوندوش مشينا الشباب اثر عليهم البرد شوي وتعبانين عاد بدت التوصيات البس ترى برد وزين اللي اخذ جاكيته معاه رحنا بتكسي لشدة الازدحام هناك وقلة المواقف ولقرب المكان من الشقه اشترينا بعض الحاجيات والهدايا حتى الساعة 9.30 في ذلك الوقت اغلب المحلات اغلقت ابوابها طلعنا برا الا برد غير طبيعي وهواء وابوندوش تعبان من قبل عرفت إن البرد راح يأثر عليه لاكن باقي شي واحد لازم اسويه ؟.

فيه تمثال صلاح الدين الحصان هذا انا متولجة كل ما جيت لسوريا لازم اخذ صورة عنده لذلك توقفنا لاخذ بعض الصور والرجال مات من البرد بدينا نبحث عن تاكسي.






هذا تمثال صلاح الدين الظاهر لو يتحرك اول من يهجم عليه انا





هذي للتوثيق


عند زاوية قصر العظم وجدنا شاب يبيع الفول توقفنا عنده نبي نتذوق اما هالفولات شو طيبين الشب ما قصر قال لبو ندوش عندي لك دواء تدعي لي عليه قال الحقني فيه طلع ذاك الكوب وشوي عصير ليمون ومع مرقة فول واشرب قال هذا عن البرد دواء تبون الصراحه طعمه رهيب ودفينا.

بعدها استقلينا تاكسي عودةً إلى البيت اتصلنا على المندي اللي في المساكن وجاب لنا العشاء عاد صار لنا كم يوم معاملينه وعرف العنوان مسافة الطريق وهو عندك.

بعدها السؤال المعتاد وين نسهر ؟ والجواب كالعادة.

[الباشا فيصل]

يوم الخميس 26/12/1426هـ مطعم الايكة واحمد

في تلك الليلة ذهبنا إلى العشاء في مطعم دلني عليه اخوي عادل مطعم الايكة قرب ساحة الميسات عند مكالمتي لاخي عادل كنا بالقرب من شارع 29 أيار اتجهنا هناك إلى المكتب السياحي التابع لوزارة السياحة السورية بصراحة ما قصروا زودوني بخرائط لجميع المدن والمحافظات السورية وخريطة ممتازة لدمشق مبين عليها اهم المعالم قلت للشباب نبي نجرب الخريطة ونمشي عليها ونروح لمطعم الميسات وابشركم وصلنا إلى الكنز دخلنا إلى المطعم كانت الصالات الخارجيه مقفله بسبب الشتاء وما فيه الا الصالة الداخلية انا اشوف انها صغيرة نسبياً المطعم جوه حلو والجلسة فيه ممتعه تعرفت هناك على شخص اسمه احمد ماني قايل لكم ايش يشتغل لاكن من زار المطعم راح يشاهد بعينه تعشينا وجلسنا عندهم حتى حان موعد السهر ثم كالمعتاد.





ابوفيصل في مطعم الايكة




ابوكايد في مطعم الايكة

يوم الجمعة 27/12/1426هـ

( عقب التمشي دوروا خشة دهام - يم السعودية تقرر يسيرون )

في ذلك اليوم ما طلعنا من السهرة الا الساعة 7 صباحا وكان معنا اصدقاء ابوكايد ورانا طريق طويل وما نمنا ولازم نمشي لان ورانا دوامات رجعنا للشقة ومعنا اصدقاء ابوكايد يوم فتحت باب الشقه الا وصاحبة الشقه قدامي تفاجئنا فيها قالت حبيت اودعكم قبل ما تمشون قلنا وحنا معانا اصدقاء ابوكايد جايين معنا يودعونا قلت دام الدعوة كذا اتصلت على صديق لي ودعيته للفطور عندنا بالشقه وشرفنا وطلبنا فطور وفطرنا مع بعض ومزح وسواليف وضحك ووداعيات بعد كذا حملنا شنطنا وسلمنا عليهم على امل اللقاء بهم مرة اخرى إن شاء الله. في هذه اللحظة رفضوا اصدقاء ابوكايد الا ان يودعونا على مشارف دمشق الحبيبة وركبوا سيارتهم وماتسمع الا عبدالكريم عبدالقادر وداعيه يا اخر ليله تجمعنا واعذرونا الصور لا تصلح للنشر.





الطريق الى درعا وشاهدوا روعة الجو والمطر على اوله





احلى وداعية





حركنا الساعة 9 صباحاً الطريق كان حلو الجو غيم ومطر واحلى وداعية وصلنا الحدود السورية حوالي الظهر تقريباً وختمنا خروج وفي امان الله وصلنا الحدود الأردنية وتفتشنا هناك وكلموا إجراءاتهم الربع ومشينا دخلنا عمان على صلاة الجمعة المساجد تخطب واصلنا سيرنا وصلنا إلى نهاية الحدود الأردنية حوالي الساعة 4.30 وختمنا خروج على امل العودة في وقت قريب إن الله أراد.

مرحباً بكم في أحضان الوطن الغالي دخلنا السعودية قبل المغرب الساعة 5 مساءاً واصلنا طريقنا إلى تبوك ثم إلى تيما وصلنا عند الساعة 10 مساءاً وتوقفنا هناك للعشاء في احد المطاعم ثم واصلنا الرحلة وصلنا حايل الساعة 3 صباحاً ثم حط رجلك إلى القصيم نزلت عند البيت بحفظ الله ورعايته الساعة 5 صباحاً واللي وراه الرياض ما يمديه على الدوام لذلك دبر وضعك اما انا يا دوب اخذ لي غفوة قبل الدوام وعند الساعة 8 صباحاً وانا في مكتبي.

وبذلك تنتهي رحلة الباشا فيصل التي ابتدت من المكتب وانتهت بالمكتب لمدة 13 يوماً مليئة بالمواقف والتجارب والوناسة في ارض اعشقها وغيري كثر سوريا الله حاميها.

[عادل المسعود]

اخي الكريم : الباشا فيصل

تقرير مصور رائع جهد كبير منك الله يعطيك العافية رحلة جميلة مع بعض المعاناة في أولها لم تسمع النصيحة في الابتعاد عن تكاسي أول الطريق قراصنة الدخول إلى سوريا هم يصطادون السائح منذ دخولة إلى أول المدينة .

انا سعيد جداً بعوتك أخي العزيز وسعيد بتقريرك المميز سوف إسمح لي بقراءته عدة مرات لكي استفيد منه واستمتع بما كتبت استمتع بأسلوبك الجميل وطرح الرائع .

كما قلت لك يا عزيزي الشقة ليست بفخامتها ولا بعفشها أو شغالتها هي راحة نفسية ربما تعجبني ولا تعجب غيري والحمدلله انكم بالاخير وفقتكم في شقة تصلح لكم الثلاثة .

اخي الباشات فيصل اكرر شكري لك على هذا التقرير المميز وشئ ليس غريب عليك فأنت للتميز عنوان

ولك اخي الكريم اجمل تحياتي وتقديري

اخوك : عادل