[ابو ريان]

[center] بسم الله الرحمن الرحيم
وبه نستعين
عبى القوم الكافرين
اخوني واحبائي................ ياهلي يا غناتي
صبحكم الله بالخير جميعا وبدون استثناء الا واحد بس ( ما لكم شغل فيه ) هو عارف نفسه
..
..
..
..
..
المهم والله انا مستحي منكم وقاطعني وجهي لأني لي فتره واصل من سوريا وما جتني فرصة ادخل المنتدى واسلم عليكم لمن مثلكم من الكرام والاجاويد يعذر
المهم يا حبايبي مااااااااااااااااااااااالكم بالطويله
وللمعلومية ترى هذي اول مرة اكتب فيها تقرير عن رحلة ( يعني لا تشرهون ) وكبرو راسي بالمدح الله لا يهينكم لاني اصدق
اولا ً الموجز

تاريخ الرحلة : 6-7-2005 م الساعة الخامسة صباحاً
تاريخ الرجوع بالسلامة : 11-8- 2005م الساعة الثانية عشر ليلا ً
مدة الرحلة : عليكم الحساب
رأيي في الرحلة : وناااااااااااااااااااااااااااااااااااااااااااااااا ااااااااااااااااااااااااااسة ولله الحمد
والمهم ان المعزبة رظت علي
السبب الاساسي للوناسة : اني ما خذت معي المزعجييين
كان ذلك الموجز واليكم الاخبار مفصلة نقدمها لكم من منتدى محبي السفر إلى سوريا
انطلقت في صباح جميل إلى البسامي وحطيت عندهم السيارة وقلت الله لا يهينكم وان كان ما عليكم كلافه وصلوها في طريقكم للقريات وقالو ما يخالف وحطيتها عندهم وقفلت راجعا إلى بيتي والطقه في راس اخوي الصغير الله لا يهينه اخذت سيارته اقظيبا مشاويري ألين يجي موعد الرحله
وفي صبيحة يوم الاربعاء الموافق 6-7-2005 انطلقت إلى مطار الملك خالد الدولي برفقه خال العيال والمعزبه وصلنا الله يجزاه خير للمطار ما يبيلها ( نوفر حق اللموزين )
انطلقنا بالطائرة إلى القصيم وقف السواق ونزل ركاب وحملو ركاب اخرين وحنا في الطيارة منطقين ثم حرك إلى تبوك ونزلنا لمطار تبوك وجلسنا حول ساعتين ثم ركبنا الطيارة ورحنا للقريات ( والله ولا خط البلده ) وصلنا القريات بسلامة الله الساعة الحادية عشر صباحا
والقط اقرب راعي تكسي واقوله انطلق بنا إلى البسامي يا رعاك الله والله لا يوريك والله ياهو قام يبربر علي راعي ذاك التكسي ويسولف ويقول وش تبي بسوريا مشاكل وسرق ونهب وقتل واغتيلات واغتصاب وتشريد وويلات وهذا ما حصل لخوي وهذا ما حصل لولد عمي وانا قام بتقلب وجهي احمر ... اخظر..... اصفر ..... بنفسجي ..... اسود والتفت على المعزبه في المقعد الخلفي وابتسم ورقع يا مرقع هذا شي ما ينترقع وانغز راعي التكسي واقوله واللي يرحم والديك اسكت ما حنا ناقصين اييييه حنا وصلنا والا ما وصلنا نزلنا من التكسي وانا ودي اذبح راعيه وبغيت ما اعطيه حقه من الزعل
يوم نزلنا وتجيني المعزبه واشرر يتطاير من عينها ( جاك الموت يا تارك الصلاة ) هاه .... وش رايك ... ما قلت لك .... ياللي فيك ما لا فيك وتقولي اماااان وهذي كلها اشاعات هاااااااااااااااه وشفيها دبي والا مصر والا ابها والا صلالة ......... الخ الخ الخ ( وانا جالس اتبسم ولم انبس ببنت شفه ) مالي وجه اتكلم واروح واستلم السيارة في صمت ويعطوني المفتاح ويقولون الله لا يهينك رح جب السيارة بنفسك وين السيارة ؟؟؟ قريبة حذفة عصا ورى مغسلة السيارات واجي واتكلم مع المعزبة بكل احترام ابروح اجيب السيارة وابجي وانتي انتظريني في الاستراحة الين اجي ................ وشو وشو بتروح تجيب السيارة وتخليني لحالي ليـــــــــش ؟ وهم ليش ما يجيبونه لك ؟؟؟ والله يا بنت الحلال مدري بس شكله مشغولين بس هي قريبه احسبي دقيقه وخمسطعشر ثانية وابجي وروح انطلق للمكان المحدد وامشي وامشي وامشي وامشي وامشى وامشي وانقطع قلبي وانا امشي ويالله وصلت ادور اتلفت ابي حارس تبن نعااال ما فيه احد ي الله واجلس ادور موتري بين خمسين الف مليون سيارة وادور وادور وادور وادور يا الله واخيرا لقيت سيارتي وبكيت من الفرحة كأني لقي كنز وانطلق اليها مسرعا وانا عظ ثوبي وااخذها بالاحضان وارجع للمكتب واشرر يتطاير من عيني وادخل عليهم معصب وش ذا الكلام ياللي فيكم مالا فيكم تقولون لي قريبه واقعد ادور وحوس يالله لقيتها يوم خلصت من الكلام قالي المصري ( ساد فيك ) ليش تروح يالمطفوق لحالك واسواق جالس يحتريك عشان يوصلك لموترك طيب ما قلتولي ؟ رد علي وانت عطيتنا فرصة لقطت المفتاح ورحت تسنك ملحوق ( وارجع للمعزبه وعينك ما تشوف الا النور وين اللس يقول دقيقة وخمس طعشر ثانية وينك فيه يابن اللذين امنو رايح كل ذا الوقت عشان تجيب السيارة ؟؟؟؟؟؟؟؟؟؟؟؟؟؟؟؟؟؟؟
يابنت الحلال الموضوع وما فيه وتقاطعني خلااااااااااااااااااااااااص
مشينا للرياض يابنت الحلال تكفين يوم وصلنا قالت من شاف اوله ينعاااف تاليه بلا سوريا بلا كلام فاضي نقعد في ديرتنا اصرف ( ووسط المحاولات للاقناع والجلسات التشاورية اقتنعت اخيرا على مضض لأني يوم شفتها مصرة على رايها تذكرت في تلك اللحظه اني انا الرجل وحمرت عيني وقلت لها المهم انا رايح لسوريا رايح بتجين معي والا بكيفك مسألة اني ابرجع للرياض انسي الموضوع يوم شافتني مصر وترضخ للأمر الواقع ونركب السيارة ونتجه للحدود السعودية الاردنية ....
وللحدسث بقية في الحلقة القااااادمة بمشيئة الله [/CENTER]

 

 

[ابو عبد العزيز]

اعجبنى هذا السجع اللطيف ريان

كمل وانا عمك والحكم اخر الجلسة

[أبو عمـــــار]

حيا الله أبو ريان
المسافر العنيد
والمغامر العتيد

الحمد لله على السلامة
وينك منحاش !! اشتقنا لك يا رجال .. يا مطول الغيبــات .........................

شكلها بتكون تفاصيل ممتعة لرحلتك

نحن بالانتظار على أحر من الجمر

إلا أقوووووووووووووووووووووووول
عمار يسلم عليك ويقولك وين البسَّـة !

[عقيلات]

أحلا شي عبرتك


( وانا جالس اتبسم ولم انبس ببنت شفه )


من اي قاموس هذي


الضاهر ان موضوعك سيحصل على جائزة أفضل موضوع


و ترانا موسعين الصدر خذ راحتك و مطط على كيفك تر كلامك كله عسل

[ابو ريان]

اخوي ابو عبد العزيز شكله جالس يحد شفرته ناويني الله يستر تكفى يا خووووك
اخي وصديقي ورفيقي ابا عمار المهم ترى شرابات عمار في الحفظ والصووون والبسة تسلم عليكم واسأل الله لها السلامة من ريااان
وتراي لمحتك في المطار بس شكلك جاي مسرع ومتأخر على الرحلة انت والشابات الحلوات الله يخليهم لك
اخي ومشرفي العزيييز الله يوسع صدرك بالعااافية ودوم ان شا الله انت والشباب تكونوون مبسوطين وابشر بتفاصيل التفاصيل بس صبركم علي جانا الدوام وحاس البرنامج اليومي عسى الله يعين
ودمتم لي احبتي .................. وبرئياكم تتم مسرتي

[ابو الياسر]

بعد السلام
اخي ابو ريان الحمد لله على السلامة
كل هالفلسفة وانت اول مرة تكتب تقرير
ماشاء الله عليك زي ماقال الاخ عقيلات موضوعك سيحصل على جائزة افضل موضوع على سبيل الجزم لم يقل ربما
فعلا بداية شيقة سوف نظطر للانتظار بالقوة الجبرية وقراءة جميع التفاصيل

توكل على الله تم الموضوع

[ابو ريان]

وصلنا جوازات المملكة العربية السعودية واحسن شي فيهم انك تخلص اجراءات الدخول والخروج وانت جالس في السيارة وما تتحرك والله الربع ما قصرو ختمو الجوازات والتربتيك وقالو في حفظ الله ورعايته انطلقنا بعد ذلك عند الاردنيين وبدا غثى الجوازات انزل من السيارة وطامر يمين ويسار ختم ورقة ثم تأمين ثم تربتك وشغلة طويله والطامة الكبرى تطبيق الحرييم ( يا شين السرج على البقر ) بيقلدون وبس وخذ زحمة الله لا يوريك عند كتطبيق الحريم غريفة صغيرة وها الحريم زحمة اللهم عافنا والله الحرمة دخلت معهم في ها المعمعة وابطت ما طلعت 10 دقايق ربع ساعة نصف ساعة مااااااش المعزبة طولت والله بيني وبينكم خفت بس مهب على المره على الدريهمات اللي معها لان الدراهم والشيكات كلها بشنيطتها وبعد انتظار طويييل وممل طلعت وهي رافعة الجواز وهي تقول ( الله اكبر .... الله اكبر ) وانا اكبر معها وننسحب من القاعة ونحن قد انتصرنا عليهم ولله الحمد وانا اخذ الشنيطة وشيك عليها الحمد لله كل شي تمااام

انطلقنا بعد ذلك مباشرة إلى درعا الحدود السورية وما وقفت نهائيا بالاردن والله يا هةو طريق شييييييييين ومكسر وتعجز وانت تقول مكسر والارض مجدبة وما تشوف الا خيام ها البدو وصلنا بحمد الله تعالى إلى الحدود السورية كذلك نفس المعاناة والتمتيير يوم جا عند التأمين واجي اعطيه من الليرات اللي معي قال لا حبيبي اصرف من عندنا وبعدين تعال لالالالا حوووول واروح اصرف من عندهم واجي لراعي التأمين واعطيه اللي معي من ليرات ولا يرجعلي الباقي باقي خمسمائة ليرا واتناشب انا وياه يابن الذين امنو العب علي في خمسين ميه بالكثير لكن خمسمية المهم رح تعال جب ود خذ رد في الاخير ابشركم خلصنا بعد حوالي ساعة ونصف الساعة المهم طبعا اخذت شريحة سورية من السوق الحرة بدرعا وبدأت باتصالاتي

اتجهت من درعا إلى دمشق والله لي زمااان عن سوريا من ثمان سنوات تقريبا ما طبيتها واتفرج وانا في الطريق واتذكر المعالم اللي كنا نمر عليها سابقا انا وبعض الشباب ايااااام الوناسة وقبل العرس

وصلت إلى دمشق حوالي الساعة الخامسة والربع وادخل دمشق واظيع فيها شوي الين مسكت طريق الزبداني انطلقت الى الزبداني مباشرة مرورا ببعض القرى على وادي بردى ومضايا وبقين حتى وصلت إلى الزبداني واتصل بحبيبي ابو عمار صديق الاسفار لني كنت متفق لامعه اجلس في شقته جزاه الله خير

والله ويقولي ابو عمار انتظر بيجيك واحد الان وواعدته عند جامع المحطه رجال شرواكم واسمه بلال خوي ابو عمار والله الرجال جاني وما قصر من سرغايا تأخر علي شوي بس ما يخالف يوم وصل والله ويرحب الرجال وياهلا ويا مسهلا الساعة المباركة اقلطو نقهويكم فنجالكم عندنا قلت الله يغنيك ويكثر خيرك ودنا لشقة الرجال لأننا تعبانيييين حيييييل قال توكلو على الله _ والله جو الزبداني كان رائع جدا والزحمة كانت خفيفة ولله الحمد اووه عاد جاي من حر الرياض للزبداني مباشرة وكل ما شفت شرطي قلت الله يستر الحين ذا بيجلدنيوياخذ دريهماتي وموتري لكن سرعان ما زال هذا الاحساس الرهيييب

المهم رحنا لشقة المذكور اعلاه ابو عمار وشفناها بصرحة حلوة واطلالتها اكثر من رائعة واثاثها نظيف وجديد وشغل متكتك بس المشكلة مدخلها صاااد شوي وانت خابر المعزبة مشحونه وخايفة من ها الديرة

هاه وش رايك ؟؟؟؟؟؟ لا لا لا لا لا ما راح نسكن فيذا محد حولنا وان طب علينا احد وان وان وانا ما ارتحت ومن ها الحتسي ان لله وانا اليه راجعون والله البلشة وش اقول للرجال الحين والله الاحراج وانا متفق معه في الرياض وخالصين والله البلشه .............. واخذ التلفون وابدا اولم الكلام ويدق التلفون الو هلا ابو عمار .........ز هاه ابو ريان اعجبك الشقه ؟ انا : هاه والله ..... ماادري بس كنها برد .... مدري حر بس كبيره هااه لا. لا صغيره ( ماش بحلت بعمري وما عرفت اصرف الموضوع ) واجيبها له على بلاطه الحرمة ما ارتاحت فيها والله الرجال الله يجزاه خير ظحك علي وقال ما له لزوم ها الكلام كله وانت ما تشتري سمك بمويه ولا يهمك ولا يكون لك فكر نهائيا واخل بلال يدورك االبيت اللي على مزاجك( الله يجزاك خير يا بو عمااار ريحتني بذا الكلام الحلو ) والله وما قصر الشيخ بلال درت انا وياه الين طحنا بذيك الشقه اللي اهلها احلا من العسل شقيقه حليوه مع حديقةصغيره واهم شي مرجيحة قل صبح اقوم بدري واتمرجح عليها مسوي نفسي رومااانسي
وااله راعي الشقة شقردي وما اخذ مني لا جواااز ولا دراهم والله وما قصر ولد اخته ابو داحم كل يوم يدق علي ويتطمن على اخباري وعلومي واذا ابي اي شي هذي بعض صور الشقة
هذي صورة من داخل الغرفة على الحديقة
http://3ssom.com/uploader/uploads5/IM000005.JPG
صورة شجرة الخوخ اللي دقيت فيها
http://3ssom.com/uploader/uploads5/IM000003.JPG
صورة مويتري وهو ملبق جنب باب الشقة
http://3ssom.com/uploader/uploads5/IM000001.JPG
مدخل الشقة الجانبي غير المدخل الرئيسي من نفس البناية
http://3ssom.com/uploader/uploads5/IM000002.JPG
صورة المرجيحة اللي تطرقنا لها
http://3ssom.com/uploader/uploads5/IM000004.JPG

المهم وصلنا الشقه حول الساعة ست مساءً وننزل العفش واخوكم تعبان وادور الفراش وادقها نومه وما قمت الا الساعة تسع ليلاً واقوم متحمس ابي اطلع واتعشى لأني ميت من الجوووع والله وننطلق إلى ودان وإلى مطعم جنة بلودان تحديدا والله يا هو رفيع وطريقه متعب جدا للسيارة مسيكينه وندخل عندهم ويرحبون فينا اجمل ترحيب كان المطعم شبه خالي من الزبائن الا من بعض الطاولات البسيطة
المهم واجلس اختار الطاوله اللي على مزاجي واجلس انا والمدااام وابداء اجول بنظري في المطعم الرائع هذا شايب هو خويه يلعبون طاولة ويأرقلون هذا رجال وحرمته واخته الصغيرة مدري بنته يأكلون الفواكه بعد العشا ويختلس نظرات الي سريعه اتوقع انه يقول وش جايبه هالحزة وإذا بي ابادره بنظره لولبيه ساحقة ارض جو فأشاح ببصره عني مسرعا ثم التفت عنه وانا اتبسم بثقة وغرور
والله كان الجو جدا بارد باااااااارد قمت اتنافظ من البرررررررررددددد يجيني القرسووون بدت عباية واقول وشو لا لا مابي اصلا ً من قال انه برد وانا اتنافظ بس على بالي شديد المهم تعشينا وانبسطنا واخذت العباية وتدفيت وعقلت يوم جا الحساب ويتجمعون ذا القراسين يبون اكراميات والله ما كان معي فراطه واعتذرت منهم وغادرت المطعم وانا اتخيل النواع الشتائم والدعوات تنهال علي من قبلهم وهممت بالعوده إلى البيت ولكني ظيعت البيت وادور وادور وفي اخر المطاف طحت فيه بالصدفه ولله الحمد
وللحديث بقيه ان شاء الله

[أبو عمـــــار]

هلا أبو ريان

الحمد لله على السلامة مرة ثانية...

أضحك الله سنك. تصدق اني جالس أقرا واضحك
يعجبني أسلوبك الروائي (الساخر). الحمد لله مروا حلقتين لحد الآن وما في حش فيني .. ! أشوا. الله يستر بس من اللي جاي.

إلا تعال كيف تشوفني في المطار وما تسلم .. تراها كبيرة في حقك وحقي بنفس الوقت.. أفااااااااااااااااا يا بو ريان.
عمار متنازل عن الشرابات.. بس ما هو متنازل عن القطوة.

بانتظار باقي التفاصيل وسردك الرائع .. ولا تنسى الصور الله لا يهينك.

تقبل تحياتي

[عقيلات]

في البداية اشوف الصور ما نزلت معك


و الطريقة هي ان تضع رابط الصورة من موقع التحميل في المربع في الاعلى و الذي فيه صورة جبل في مربع اصفر



و للتصغير

استخدم الرسام


و اليكم باقي الصور

[ابو ريان]

مساكم الله بالخير جميعا .............. واهلا بكم مرة اخرى
اخي العزيز كي ون كي ون كي ون ( خلص الاسم ولا بعد ) كي ون ( هذي هديه مني )
اولا اسعدني كثيرا مرورك الجميل على الموضوع واطرائك الرائع والذي اعتبره وسام فخر واعتزاز
اخي الكريم ابو عمار
العذر والسموحة منك .............. بس القطوه انس الموضوع والشرابات ناوي اوي لولدك سحر اخليه ما ينام الا بينكم انت والمعزبه
مشرفي العزيز شكرا للتوجيهات الكريمه والهامة وسوف يتم العمل بها بإذن الله