[lumina]

بدك تعرف ليش سمو سوريا "مهد الحضارات"... سوريا مليانة آثار : مدن قديمة - قلاع - جوامع و كنايس و معابد أثرية - أسواق و بيوت قديمة... و ما بيخلص الحكي عنها.

شفت بسوريا من كل آثار العالم أثر... و كأنها عم تحكي معك و تخبرك قصة حضارات الأرض...

الرحلة يللي طلعنا فيها انا و العيلة كانت رائعة... هالمرة ما اجينا صيفنا، بالعادة منروح على مناطق اصطياف متل صافيتا و بلودان و الوادي. هالمرة قررنا نشوف آثار سوريا.. لأنو كل مرة حدا بيقلنا بلدكون "مهد الحضارات" او بيقولو "مليانة آثار من كل حضارات العالم" و نحنا اهل البلد مو شايفينا.. قررنا ننزل عسوريا اجازة عائلية هالمرة و نعمل سياحة أثرية...

الشام و كل شي حواليها: صيدنايا - معلولا - شهبا - بصرى - و طبعا سوق الحميدية و قصر العظم و الجامع الاموي... سهرنا انا و بقية صبايا و شباب العيلة سهرة كتير حلوة بمطعم بالشام القديمة.
حمص و الوادي: قلعة الحصن و دير مار جرجس و وصلنا بعدين على افاميا و كفينا عطرطوس لنشوف جزيرة أرواد وعمريت - يللي صرلون بحسب ما قالو 3 سنين عم ينقبو فيها - وتغدينا عالغروب بصافيتا - ويا الله ما احلى صافيتا، خصوصي عالغروب - وبعدين طلعنا عاللادقية.
اللادقية: اول يوم رحنا عأوغاريت... وبعدا رجعنا بنزول على حصن سليمان وولله بيستاهل ينشاف و الغدا كان بكسب كمان عالغروب، عجبتنا فكرة الغدا عالغروب بمكان عالي و كلو طبيعة حلوة...
تاني يوم قضينا عالبحر يوم من العمر و سهرنا عالشط و بعدين كفينا على حلب وعالنوم فورا لانو متنا تعب - وشو بدي احكي عن حلب: اول يوم زرنا الاسواق و القلعة و الخانات القديمة و الجامع الكبير. والسهرة كمان كانت حلوة بحلب القديمة. و تالت يوم كمان قضيناهون بحلب، طلعنا على ايبلا و معرة النعمان و عين دارة و المدن المنسية. متعبة بس تجربة حلوة.
المهم وقت وصلنا على تدمر شفنا كل الآثار و تغدينا بالاوتيل و المسا تعشينا بالخيمة. الاجواء كتير حلوة بالخيمة و رقصنا و دبكنا لوش الصبح. كان مليان اجانب بتدمر متل العادة
بس ما بتخلص الآثار شو ما شفنا... بحسب الموقع يللي اجينا عن طريقو هي كانت افضل مناطق و احلى مواقع أثرية لزيارة اسبوع واحد...

بعد الاسبوع "الأثري" اخدنا 3 ايام اصطياف.. و طبعا طلعنا على البحر (عالرمال الذهبية بطرطوس) لأنو ما شبعنا منو باللادقية. و خلصت زيارتنا و كانت من رحلات العمر

كل اللي تاركين سوريا و مغتربين: يا جماعة بلدكون بيجنن تعو شوفوه...لا تخلو حدا يحكيلكون عنو، انتو احكو للعالم عن سوريا "مهد الحضارات"

 

 

[عادل المسعود]

كلام جميل
الله يعطيك العافية

[lionpharma]

شكرا على الكلام الجميل

[عرب123]

الموضوع والكلام جميل
ويعطيك العافيه على تعبك