[غرابيل]

بسم الله وعلى بركة اللة نبدأ
بداية القصة كنا مجتمعين ليله من الليالي في الاسراحة وبما ان السواليف لاتطيب مع تلك المجموعة الا بالحديث عن السفر والقصص وخصوصا اني كنت ناوي اقدم اجازه طويله وفيها تخطيط لاكثر من سفرة انا وبعض الموجودين وليس كلهم, المهم تدخل واحد من الاصحاب وقال لي ليش مانسافر الى الشام ان ابن عي له مزرعة في بلودان وهو هناك الحين ومعزم علي اجي وان المزرعه فيها اشجار وفيها مسبح وفيها بيت شعر كبير وفيها وفيها ( اسلوب تشويق ) وعددلي من الميزات ما جعلني اتصور اني هناك في تلك اللحضه فقلت له مشينا قال ماتجزم قلت افا عليك لو تبي بكرا ( خصوصا ان السكن مجاني )يعني نص القطه طاحت , قال خلاص بكرا بكرا ليش لا .
طبعا الكلام هذا يوم الجمعة ليلة السبت وبعد المشاورات اتفقنا انا وهو وصاحب ثاني ان يكون الممشى بأذن الله يوم الثلاثاء , داومت السبت وقدمت الاجازه وهي تبدأ من يوم الثلاثاء .
اتا الثلاثاء العصر اتصل على صاحبنا الثالث ( كان عنده شغل في الرياض وراجع الثلاثاء )مسكر جواله قلنا عسى خير ننتظر الى الغد , ونفس الحكايه الجوال مغلق ونصبر الى الاربعاء ونفس الشي انا انشغل بالي عليه خصوصا ان الرجال صاحبي عشرة عمر وماهي من عاداته يسوي كذا الا اذا فيه شي ضروري .
صار الخميس وانا على اعصابي الصراحه كنت قلقان عليه مررررره واسأل اصحابنا اذا انه يعرف حاجه او سامع شي ولا فيه خبر وصاحبي الثاني بس يتصل علي هاه وش صار نمشي ولا لا , قلتله تراك ازعجتنا كل شوي مزعجني في التلفون وتراني ماني ماشي بدون صاحبنا او اقل شي يجي خبر يطمنا عليه .
الزبده صار الجمعة وبعد ماصليت الظهر جاني اتصال وطمني على صاحبنا في الرياض وانه كويس وان كل السبب مشكلة خااااااصة , اهم شي انه مافيه حاجة وطيب .
اتصلت على صاحبي اللي هنا وقلتله الوعد صلاة العصر عندك قال انا جاهز منذ مبطي بس تعاااااااااال .
صليت العصر معه وركبتة على سيارتي ( GX ) وسكنا الخط قالي وش رايك لو فيه واحد يخاوينا قلت مين هو قال صاحب لي من زمان واثق فيه وشرط يعجبك وولد قلبك في السفر ومن الناس اللي ينتحر على الشام قلت قدام , اتصل عليه وقال وينك قال انا الحين جايب عيالي من الرس قاله بسرعة تراني ماشي سوريا قال انت صادق قاله واللة انا بالخط بس ابيك تخاويني قال بس عيالي والدوام والفلوس قاله ولايهمك جب شنطتك بس وتعال وتكفى تراني وحداني قال خلاص بس اوصل الوعد عند اشارة المعارض .
بعد نصف ساعة مريناه عند بيته ويركب وهو مستحي ومستغرب يقول ليش تنصب علي تقول لوحدي , المهم مشينا وقبل مانوصل جسر الجهرا وتقطع علينا مجموعة من البعارين الطريق وامسك فرامل وينفجر اصلاح الفرامل الخلفي ويصير بدون فرامل , لكن ربك سترها معنا ( واللة شفت الموت قدامي ) وواصلنا الطريق بدون فرامل لحد تيما الساعة 12 مساء والورشات مسكره , حصلنا واحد وقلناله صلحة لو يعبرنا الى الشام اهم شي مانوقف .
صلحة ومشينا والحمد لله يوم السبت الظهر في وسط المزرعة ونحصل ولد عمة ينتظرنا بالفطور (الناس تتغدا وحنا نفطر) وخذ سوالف وضحك لحد ماخلص الغداء العصر وتغدينا قلت بعد اذنكم انا رايح انام عشان الليل اكون مصحصح ورايق بعد الخط الطويل .
اليوم الثاني كله راح ضحك وسوالف خصوصا انة كلنا مانتعارف بس صاروا احلى اصحاب هذا يتكلم عن مغامراته وسفراته ووين راح وايش زار والوقت يطير والله ماحسينا في الايام خصوصا المزرعة مغرية الجو بارد والمناظر روعة كلها شجر فواكة .
ماقلتلكم انة فية واحد من اصحابنا كان في الهند وبس عرف اننا في الشام طار عقله نفسه يجي بس مافيه حجز من الهند الى دمشق , حجز الى الرياض ومن الرياض الى الشام على السيارة ولوحدة وبدون مايمر البيت يعني مباشرة ومايوقف الافي وسط المزرعة(الصراحه اجرام) لا وكمان وصل الظهر ولا نام الا بعد ماسهر الليل كله.
اليوم الثالث والرابع مطلعنا الاللظرورة , واحلى مافي السفرة رغم قصر وقتها انه اغلبنا مانتعارف يعني صارت السفرة تعارف على اصحاب جددوالله من كل قلبي انا اعتز فيهم من جد (عسى ربعنا في المنتدى يسوونها).
يوم الاربعاء كان اليوم اللي مشى فيه صاحب المزرعة الى الرياض بعد ماودعناه كملنا الجلسة لحد اليوم التالي (الخميس) تغدينا بدري وطلعنا ناوين السعودية سيارتين حنا وراعي الهند اللي ركب معاه واحد من الشباب .
الاوضاع حلوة وصلنا الحدود السعودية ونطلع منها الساعة 8 مساء الخميس واول محطة نوقف فيها عشان نشوف مباراة السعودية وتونس (ونتعشى بدري عشان مانوقف مرة ثانية).
كملنا طريقنا وبعد ماوصلنا تيما وقفنا واخذنا غرفتين ونمنا وارتحنا وبكرا الضهر كملنا طريقنا الى قصيم العز والحمد للة على السلامة .
وهذي بعض الصور اللي قدرت اصورها:

 

 

[عادل المسعود]

أخي العزيز : غرابيل

قصة رحلتك غريبة ومشوقة كم تمنيت ان يطول السرد بالتفصيل لكي نعيش معك هذه القصة الجميلة الغريبة حيث انك تسافر مع اشخاص ولأول مرة ولا تعرفهم تجربة جداً جميلة وتدل على انك انسان اجتماعي طيب القلب حسن الخلق وانا عرفت عن كثب في لقاء الطائف والله يشهد كم اكن لك من المعزة والتقدير

شكرا لك على التقرير والصور .. وادئماً سنكون بانتظار ابداعاتك

ولك اجمل تحياتي وتقديري

اخوك : عادل

[ابو الياسر]

بعد السلام
أخي ماجد تسلم يداك على إبداء هذه المغامرة العجلة لسوريا الحبيبة
وبالفعل كنا نريدها تطول على حلقات لنبقى معك باحساس الشوق لتلك البلاد

[غافل فاضل]

رووووووووووووووووووووووووعة ياغرابيل سرد سريع ورائع ورحلة مجنونة

والحمد لله على السلامة بسبب البعارين الله يكفي الناس شرها

وفعلا السعودين في سوريا يصبحون يدا واحده ليتها دوم ان شاء الله

[غرابيل]

اخوي عادل مشكور على كلامك المشجع واللي يرفع المعنويات وانا من كل قلبي كمان احملك الحب والتقدير .

وانت اخوي وعزيزي ابو الياسر مشكور على مرورك وتشريفك للموضوع,واللة كان ودي اطول والقصة فيها احداث ماتكلمت عنها لكن مليت من الكتابة والجايات اكثر .

اخوي غافل فاضل مشكور على مرورك وهذي البعارين حاجة تخوف وانا في الرجوع نمت في تيماء واللة كنت خايف من الخط في الليل .

وفية نقطة مهمة انه السيارة لما صلحتها في تيماء في الذهاب على اساس اني اصلحها في سوريا بس زانت الجلسة وماصارفيه وقت للتصليح ورجعت عليها بدون تصليح .

والمواضع الجاية نخليها على شكل حلقات ونطول فيها .

[الرساوي]

تقرير رائع اخوي ماجد
وشيق بس الصور ماطلعت مغي
تحياتي وتقديري

[خاااالد]

عزيزي غرااابيل

ياسلام عليك على هالتقرير ياخوي مختصر حيل وش فيك عجل
هدي ياخوي هما الفرامل خربة خخخخخخخخخخخ

بس الصور شي والله تسلم لي يالغاااااااااالي

كل الشكر والتقدير لك

خاااالد

[ابو الياسر]

بعد السلام
أخي ماجد شوف لنا حل بالصور ما فتح منها الا أربع

[غرابيل]

حبيبي الرساوي وابوالياسر الصور طالعة عندي وجربتها في كمبيوتر ثاني وطلعت حلوة .

[ابو الياسر]

بعد السلام
اخيراً طلعت
ماشاء الله موقع وموقع مكلف الله يهني صاحبها ويهنيكم حميعاً
تسلم حبيبي ماجد